Redakcyja niedziaržaŭnaj haziety «Vitiebskij kuŕjer» 5 vieraśnia atrymała ź milicyi adkaz na zajavu z prośbaj vyjavić i pryciahnuć da adkaznaści aŭtara lista z pahrozam ad RNIE.
U paviedamleńni za podpisam namieśnika načalnika Kastryčnickaha RAUS Viciebska śćviardžajecca, što «u chodzie praviedzienaj pravierki vyjavić asobu, jakaja dasłała vam list-papiaredžańnie nie pradstaviłasia mahčymym . U vypadku vyjaŭleńnia asoby vam paviedamiać dadatkova.»
Nahadajem, 10 žniŭnia hazieta «Vitiebskij kuŕjer» atrymała list z pahrozami, dysyłalnikam jakoha paznačana arhanizacyja «Russkoje nacionalnoje jedinstvo».
U liście sa źniavažlivym źmiestam vykazvałasia patrabavańnie da haziety pierahledzieć na praciahu miesiaca svaju infarmacyjnuju palityku i «priekratiť publikacii, diskrieditirujuŝije suŝiestvujuŝuju v Biełarusi vłasť i hłuboko uvažajemoho nami piervoho priezidienta Aleksandra Hrihoŕjeviča Łukašienko, vied́ on viediet nieprimirimuju, vsielenskuju boŕbu za vieličije słavianskich narodov s židami i libierałami vsiech mastiej, kotoryje striemiatsia porabotiť vielikij russkij narod». U advarotnym vypadku pahražałasia zadziejničać «vsie svoi riesursy i śviazi v koridorach vłasti», kab maksimalna chutka zakryć hazietu.
Tekst lista dapaŭniaŭ malunak - małady mužčyna ŭ vajennaj formie, azdoblenaj svastykaj, trymaje ŭ adnoj ruce padviešanaha na viaroŭcy čałavieka, na hrudziach jakoha namalovana zorka Davida, a z kišeniaŭ syplucca dołary, a ŭ druhoj - mieč. Pad malunkam podpis: «Očistim Rośsiju!».
Treba adznačyć, što ŭ Baranavičach milicyja taksama nie zmahła vyjavić złačyncaŭ - aŭtaraŭ ananimnych pahroz u adras niedziaržaŭnaj haziety «Intex-press», jakija atrymała redakcyja sioleta 18 lipienia.
