Jak stała viedama «Biełaruskamu partyzanu», u chutkim časie znany režyser Jury Chaščavacki manicca paradavać Biełaruś (dy nia tolki) čarhovym filmam. Chaščavacki razam z druhim režyseram i suaŭtaram užo amal skončyŭ pracavać nad dakumentalnym kino z pracoŭnaj nazvaj «Płošča Kalinoŭskaha».
«Kali kazać karotka, dyk heta film pra biełaruskuju moładź, – kaža režyser. – My chacieli razabracca, jakija pabudžalnyja matyvy pryviali biełaruskuju moładź paśla prezydenckich vybaraŭ na płošču. Ci isnuje siońnia dyjaloh (ci dysput) pamiž roznymi pakaleńniami ludziej. Jak ludzi, katoryja žyvuć u viosačcy pobač z mahistrallu «Bieraście–Maskva» biez telefonaŭ i elektryčnaści, zusim niepadaloku ad Miensku, staviacca da prablemaŭ demakratyi i dyktatury, jakuju škału kaštoŭnaściaŭ jany siońnia majuć, što ich niepakoić bolej ad usio?» Siarod hałoŭnych hierojaŭ filmu – čaroŭnaja dziaŭčyna Daša, jakaja praviała nie adnu noč u namiotavym miastečku na Kastryčnickaj płoščy, pierajmienavanaj samoj moładździu ŭ «płošču Kalinoŭskaha»; lider niezarehistravanaj arhanizacyi «Małady Front», jaki zaraz znachodzicca «na chimii» ŭ vioscy Małoje Sitna Viciebskaj vobłaści Pavał Sieviaryniec; žonka hvałtoŭna skradzienaha aperatara ORT Źmitra Zavadzkaha Śviatłana z synam, a taksama tyja, kaho źvinavačvajuć u dačynieńni da spravaŭ źnikłych Zacharanki, Hančara, Krasoŭskaha i Zavadzkaha. U filmie natrapim na mnostva kryłatych vyrazaŭ A.Łukašenki – pra adukacyju, vieršy Bykava i inš. z admysłovym videašeraham. Z usiaho miarkujučy, u šyroki biełaruski videaprakat hety film trapić nia zdoleje. Jury Chaščavacki razvažaje, što «Płošča Kalinoŭskaha» strenie niedzie taki ž samy los, jak i film «Zvyčajny prezydent».
«Ja nie liču na toje, što «Płošča Kalinoŭskaha» pieramoža na niejkich prestyžnych festyvalach. Ale miarkuju, što peŭnaja cikavaść da hetaha filmu budzie», – zahadkava kaža Chaščavacki. Ad siabie mahu dadać: «Płošča Kalinoŭskaha» – heta nia nudnaja dakumentalistyka, ale vydatnaje ihravoje kino, jakoje hladzicca na adnym podychu.
❏
Fota Julii Daraškievič
