Jany nie vierać aficyjnym vynikam i piśmova paćviardžajuć, što na vybarach prahałasavali za pradprymalnika Dźmitryja Usa.
Kala tysiačy čałaviek tolki z dvuch vybarčych učastkaŭ (a ŭsich pa Kastryčnickaj akruzie Minska №17 — 9 i adzin śpiecyjalny) patrabujuć ad Centralnaj vybarčaj kamisii zrabić pieralik hałasoŭ. Jany aburanyja i rasčaravanyja vynikami miascovych vybaraŭ — adkul uzialisia takija nievierahodnyja ličby?
Niezaležny kandydat Dźmitryj Us užo byŭ deputatam Minskaha haradskoha savieta ŭ 1999 — 2003 hadach. A ŭ 2003 i 2007‑m jaho nie zarehistravali kandydatam uvohule.
Za svajo vyłučeńnie na apošnich miascovych vybarach jon sabraŭ 5 tysiač podpisaŭ pry nieabchodnych 150.
Ale — projhryš! Aficyjna jon nabraŭ pryblizna 33% (kala 4,5 tysiač) hałasoŭ, na 8% mienš za staršyniu prafsajuznaj arhanizacyi zavoda «Intehrał» Halinu Marcinovič.
Apytanyja žychary akruhi pa‑raniejšamu dobra pamiatajuć Dźmitryja Usa, a deputataŭ z 2003 hoda navat i nie bačyli.
Žančyna: «Za kolki hadoŭ Us byŭ adnym kandydatam, jakoha my bačyli svaimi vačyma. Jon prychodziŭ da ludziej na vulicu, voś siudy, i pytaŭ, jakija prablemy. Jon niepažadany dla ŭładaŭ, bo hrošy traciŭ, kudy treba ludziam!»
Dźmitryj Us pakazvaje sotni podpisaŭ za pieralik. Ich źbirajucca dasłać u Centralny vybarčy kamitet.
Dźmitryj Us: «Voś analiz: 24 śpiecyjalny učastak, špital. U pratakole mnie namalavali 28 podpisaŭ. Ludzi sabrali 33 za pierahlad. Vychodzić, u pratakole mieniej ličba, čym za pierahlad. Voś 90 kvateraŭ dom — 76 podpisaŭ za pieralik. Pa inšych damach padobnaja situacyja».
Davieranaja asoba Dźmitryja Usa Jaŭhienija kaža, što na svaje vočy bačyła, jak sakratar adnoj z vybarčych kamisij pierakłała biuleteni za Usa ŭ inšy stos.
Jaŭhienija: «Jana paŭtonam spytała ŭ žančyny, jakaja ličyła hałasy, ci heta biuleteni za Usa. Jana dvojčy prahnaj rukoj sa stosa Usa pierakłała ŭ inšy. Ja svaimi vačyma bačyła, padniała skandał tam. Mnie skazali, kali ja nie zatknusia, to milicyjant vyviedzie za dźviery».
Na tym samym učastku byli fakty, kali ludzi prychodzili hałasavać, a za ich užo stajali podpisy. Aprača taho, asobnaha pieraliku biuleteniaŭ z daterminovym hałasavańniem nie było, adznačaje Jaŭhienija.
Dźmitryj Us pryvodzić prykłady ź inšych učastkaŭ.
«Na ŭčastku 20 było 170 biuleteniaŭ na daterminovym hałasavańni. Vyviernuli skryniu — tam było minimum 600‑700. Miša, maja davieranaja asoba, pačaŭ fatahrafavać. Jany paklikali milicyjanta, skazali: «budzieš fatahrafavać — vyviedziem!».
Sakratar Centrvybarkama Mikałaj Łazavik paviedamiŭ, što takaja vialikaja kolkaść podpisaŭ vybarcaŭ za pieralik hałasoŭ biesprecedentnaja. Ale zajavy ludziej razhladać nie buduć: adviedzienyja zakonam try dni paśla vybaraŭ prajšli.
Mikałaj Łazavik: «Siońnia ŭ nas 4‑ha. Usio — ciahnik prajšoŭ. Chto nie paśpieŭ, toj spaźniŭsia. Moža ŭ Dźmitryja Usa było arhanizacyjnaje jadro, jakoje papracavała, i jano mahło arhanizavać takoje masavaje niezadavalnieńnie»