Čym pahražajuć biełaruskamu internetu pastanovy Saŭmina 2

Saviet ministraŭ za adzin dzień naštampavaŭ cełych piać pastanovaŭ datyčna internetu. Usio heta zroblena ŭ miežach daručeńniaŭ prezidenta pa napaŭnieńni sensam normaŭ ukazu № 60 «Ab mierach pa ŭdaskanaleńni vykarystańnia nacyjanalnaha siehmientu sietki Internet». Udaskanalili biełaruski internet u najlepšych tradycyjach sučasnaj Biełarusi — razabracca ŭ nahruvaščańni adsyłak i pastajannych źmianieńniach naŭrad ci zmoža navat daśviedčany juryst.

U bajnecie ŭžo sutki cišynia i ździŭleńnie — tolki ŭviečary źjavilisia karotkija pierakazy tekstaŭ pastanovaŭ u stužkach infarmahienctvaŭ.

Padsumoŭvajučy novaŭviadzieńni možna skazać, što ŭrad pasprabavaŭ adrehulavać dostup karystalnikaŭ u internet u miescach kalektyŭnaha karystańnia, sfarmulavaŭ ahulnyja patrabavańni da dziaržaŭnych sajtaŭ, akreśliŭ mietodyku ŭliku optavałoknavych linij i infarmacyjnych resursaŭ bajnetu, a taksama ŭvioŭ novyja praviły pracy internet-kramaŭ (treci raz za paŭtara hoda).

Na dumku Electroname.com, sproba nie zusim udałaja:

1. Pastanovy № 646 i № 647. Patrabavańnie identyfikacyi karystalnikaŭ i zachavańnie łohaŭ u miescach kalektyŭnaha karystańnia było i raniej. Byli navat kamiery nazirańnia. Inšaja sprava, što nichto hetaha patrabavańnia nie vykonvaŭ, i vialikaje pytańnie, ci buduć jaho vykonvać i nadalej. Navinkaj možna nazvać zachavańnie identyfikacyjnych źviestak pra abanienckija pryłady (MAS-adras, unutranyja i vonkavyja IP-adrasy).

Napeŭna, heta i jość taja samaja ščylina, jakaja pavinnaja dazvolić «Biełtelekamu» raźvivać sietku Wi-Fi. Adkryjem žudasny sakret — usie hetyja MAC- i IP-adrasy možna źmianić, i BDUIR dla hetaha zakančvać nieabaviazkova. Moža, prymiem ciapier pastanovu, jakaja zabaraniaje źmianiać MAC-adras sietkavaj karty na asabistym kamputary, a jaho kanfihuracyju rehistravać u AAC?

2. Spadčyna ahrareniesansu nievynosnym ciažaram cisnuła na raspracoŭščykaŭ pastanovy № 645 «Ab niekatorych pytańniach internet-sajtaŭ dziaržaŭnych orhanaŭ i arhanizacyj». Z adnaho boku, dobra, što ŭrad šturchaje ŭ śpinu lanivych čynoŭnikaŭ i prymušaje pryvieści dziaržaŭnyja sajty ŭ adnosna čałaviečy vyhlad. Z druhoha — prymać dakumienty pa juzabilici nie sprava prezidenta i premjera. Tak niedaloka i da ŭradavych rekamiendacyj pa PHP i Java dapisacca. Niepryjemnym, ale łahičnym novaŭviadzieńniem staŭ pieranos usich sajtaŭ dziaržorhanaŭ na damieny GOV.BY i MIL.BY. Kahebešnikam, padatkavikam i pažarnikam daviadziecca admovicca ad svaich hučnych i raskručanych damienaŭ u nacyjanalnaj zonie. BY. Źviartaje na siabie ŭvahu punkt, pavodle jakoha padtrymkaj sajta pavinnyja zajmacca dziaržsłužboŭcy. Ci značyć heta, što addać na aŭtsors padtrymku nielha?

U cełym pastanova atrymałasia miakkaj i pryjaznaj. Nabor rekamiendacyj, nie bolš. Chto budzie adkazvać za vyniki i jakoje pieraduhledžana pakarańnie za nievykanańnie pastanovy — niezrazumieła. Elektronnym uradam tut i nie pachnie.

3. Asablivuju zaniepakojenaść vyklikaje pastanova № 644. Havorka pra Dziaržaŭny rejestr infarmacyjnych sietak, sistem i resursaŭ, u jaki zanosicca ankieta infarmacyjnaj sietki, sistemy abo resursa z bolš čym tryccaci punktaŭ. Zajmacca hetym buduć pastaŭščyki internet-pasłuh (vyznačeńnie vielmi ćmianaje — ciapier pad imi majucca na ŭvazie chostynhavyja kampanii, internet-pravajdery i data-centry).

Paśla pračytańnia punktaŭ zajavy ab rehistracyi apuskajucca ruki. Naprykład,

dla rehistracyi sajta (a rehistravacca pavinnyja jak jurasoby i IP, tak i fizičnyja asoby), treba ŭkazać imia, proźvišča, pašpartnyja dadzienyja, adrasy i telefony, elektronnuju poštu, źviestki z ADR, ulikovy numar płatnika, numar damovy z chosteram, pravy na sajt, apisańnie sajta, sietkavyja (IP) adrasy, vykarystoŭvanyja resursy, damiennyja imiony, rehistracyjny numar CAD, typ chostynhu, vykarystoŭvanyja resursam party transpartnych pratakołaŭ, pieralik sietkavych adrasoŭ.

Voźmiem prosty prykład — źmiena chostynhu. Ciapier heta zajmaje ličanyja hadziny i časam žyćciova nieabchodna dla bieśpierabojnaj pracy sajta. Z 1 lipienia daviadziecca pierapisvać ankietu, adpraŭlać na ŭzhadnieńnie, płacić za heta hrošy, urešcie. Vielmi zručna.

Ci varta kazać, što pastanova fiksuje isnujučy ŭ Biełarusi ŭzrovień raźvićcia internet-technałohij, zahaniaje ich u ramki i faktyčna zabaraniaje ekśpierymienty i inavacyi ŭ hetaj halinie. Vobłačnyja chostynhi, hnutkaje maštabavańnie sistem, rehijanalnyja lusterki, API i mnohaje inšaje, što jašče budzie prydumana ŭ najbližejšy čas, zastajecca za miažoj razumieńnia raspracoŭščykaŭ dakumienta, a ŭśled za imi — i ŭsiaho bajnetu.

Vidavočna, internet u Biełarusi jak biznes-asiarodździe pierastaŭ być vyspaj svabody i ciapier całkam adpaviadaje ahulnamu biznes-klimatu ŭ krainie.

4. Jaskravym paćvierdžańniem hetaha słužyć pastanova № 649 «Ab rehistracyi internet-kramaŭ u Handlovym rejestry Respubliki Biełaruś, miechaniźmie kantrolu za ich funkcyjanavańniem». Za apošnija niekalki hadoŭ biełaruski internet-handal namahańniami aficyjnaj prapahandy pieratvaryli ŭ župieł, rassadnik šeraha impartu i biezzakońnia. Umovy pracy internet-kramaŭ mianialisia try razy, i ciapier razabracca, što možna rabić, a što nielha, praktyčna nierealna. Biełaruski internet-handal adździačyŭ tym ža i za dziesiacihodździe isnavańnia dalej onłajn-ždanovičaŭ nie pajšoŭ. Niešmatlikija vyklučeńni ŭ vyhladzie knižnych kramaŭ tolki paćviardžajuć praviła.

U cełym nabor pryniatych dakumientaŭ nie vyrašaje nivodnaj isnujučaj prablemy biełaruskaha internetu, a tolki stvaraje novyja pieraškody na šlachu jaho raźvićcia.

Uvodziacca biessensoŭnyja pracedury i praviły, jakija, pa ahulnym nastroi internetčykaŭ, zaklikanyja tolki «zakrucić hajki» i pavialičyć košt vychadu luboha biznesu ŭ onłajn. U našaj krainie niama 1,5 młrd žycharoŭ, my nie možam zamknuć nacyjanalny siehmient sietki tolki na sabie, i šancaŭ u biełaruskaha onłajn-biznesu ŭ takich umovach niašmat.

Electroname.com

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH