Pamior lehiendarny chevi-mietalist. Piša Alaksiej Dzikavicki.
U niadzielu ŭ špitali ŭ Chjustanie (štat Techas, ZŠA) ad raku straŭnika pamior adzin z najvialikšych vakalistaŭ u historyi chard-roku i chevi-mietału Roni Džejms Dya.
Dla mianie asabista pačatak znajomstva z Dya heta savieckaja kasieta MK60, praz drennuju jakaść jakoj časta treba było čyścić mahnitnuju hałoŭku ŭ ajčynnym mahnitafonie Biełaruś-301, ź jahonym pieršym, hienijalnym albomam «Holy Diver» (1983). Niama, badaj, amatara ciažkaj muzyki, jaki nie viedaŭ by kłasičnych užo piesień z toj kružełki: «Rainbow in the Dark», «Stand up and shout!», «Don't talk to strangers»…
Nu i potym, viadoma, toje, što było jašče da pačatku solnaj karjery — supraca z Rainbow Ryčy Błekmara i Black Sabbath.
Z Rainbow Dya zapisaŭ 4 albomy, jakija taksama stali pačatkam i kłasikaj ciažkaha roku, pieradusim havorka idzie pra «Rainbow Rising» (1976). Z pryčyny tvorčych sprečak z Błekmaram Dya adychodzić z Rainbow, ale ŭžo praz hod dałučajecca da Toni Ajomi, Hizera Batlera, Biła Uarda, kab zapisać adzin z najbolš viadomych u historyi Black Sabbath albomaŭ «Heaven and hell» —
Sing me a song, you're a singer
Do me a wrong, you're bringer of evil….
Na pačatku 90-ch Dya jašče raz dałučyŭsia da Black Sabbath (papiarednim razam jany raźvitalisia naprykancy 1982 paśla 3 sumiesnych albomaŭ), kab zapisać adnu z najbolš ciažkich i, mahčyma, najmienš zrazumiełaj dla fanataŭ prahramaŭ u historyi hurta «Dehumanizer»… Potym, užo ŭ hetym stahodździ byłyja muzyki z Black Sabbath iznoŭ sabralisia ale pad šyldaj Heaven and hell, vyrušyli ŭ daŭžeznaje turne dy zapisali albom «The devil you know»…
Zavitali muzyki Heaven and hell u časie hetaha turne i ŭ Varšavu (červień 2007-ha).
Pryznajusia, što chacia ja niezadoŭha da hetaha i byŭ na jahonym solnym kancercie (tady hurt Dio hraŭ u Varšavie adrazu paśla Miensku) i śpiavak byŭ u dobraj formie, dyk tym razam niejak pabojvaŭsia: jak nie kažy, ale bolej za 60 hadoŭ jamu ŭžo, ci zmoža «vyciahnuć» usio jak naležyć.
Adnak užo ź pieršaj pieśni ŭsio stała zrazumieła — heta prafiesijanał najvyšejšaha ŭzroŭniu.
«Vialiki hołas małoha čałavieka» (tak Dya nazyvali dziela nievialikaha ŭzrostu) byŭ takim ža mahutnym, jak i 20 hadoŭ tamu. Vialiki kancert vialikich muzykaŭ, pieradusim — vakalista…
Fanaty Dya lubiać raspaviadać historyju (ci praŭda heta, ci tolki lehienda, ciapier užo ciažka skazać), jak maleńki Roni Padavona (Dya — heta tvorčy psieŭdanim (darečy, biez zališniaj ścipłaści, pa-italjansku «boh»), pavodle pachodžańnia — italjaniec), majučy kala 10 hadoŭ, załaziŭ na dach chmaračaosa dy kryčaŭ adtul kolki chapała siły: «Vy jašče daviedajeciesia pra mianie, pačujecie moj hołas!!!»
Hołas vialikaha małoha vakalista sapraŭdy pačuli miljony.
Akramia vialikaj kolkaści napisanych im kampazicyjaŭ, jakija daŭno stali kłasikaj, prynios śvietu ciažkoha mietału jašče i znak (tak zvanuju «kazu»), pa jakim adzin prychilnik biezpamyłkova mietału paznaje inšaha.
Dyja zajmaŭsia taksama dabračynnaściu ŭ fundacyi Children of the Night, jakaja zmahajecca ź dziciačaj prastytucyjaj.
- The lover of lifes not a sinner
The ending is just a beginner
The closer you get to the meaning
The sooner you'll know that you're dreaming
So it's on and on and on, oh it's on and on and on
It goes on and on and on, heaven and hell….
- Toj chto lubić žyćci — nie hrešnik
Kaniec, heta tolki pačatak
Čym bližej ty da sensu
Tym chutčej razumieješ, što tolki maryš….
I tak praciahvajecca….. Niabiosy i Piekła…..
(Heaven and Hell, słovy Roni Džejms Dya, 1980)
