Ministerstva justycyi Biełarusi zajaviła pra niedapuščalnaść zaciahvańnia Ekanamičnym sudom SND razhladu pazovu da Rasii ab pošlinach na naftapradukty.
U paviedamleńni, raźmieščanym 24 maja na sajcie Miniusta, adznačajecca, što 18—19 maja adbyłosia rasparadčaje pasiadžeńnie kalehii Ekanamičnaha suda SND, pryśviečanaje «razhladu spravy pa zajavie ŭrada Biełarusi ab niepravamiernaści źbirańnia rasijskim bokam vyvaznych mytnych pošlin na naftapradukty, što pastaŭlajucca z Rasii ŭ Biełaruś». Kalehija «vyrašyła praciahnuć padrychtoŭku spravy da sudovaha razboru ŭ miežach rasparadčaha pasiadžeńnia, jakoje pryznačana na 22 červienia».
Ministerstva justycyi vystupaje «kateharyčna suprać hetaha rašeńnia suda» i zajaŭlaje, što jano supiarečyć rehłamientu suda.
«U adpaviednaści z punktam 61 rehłamientu kalehija suda nie paźniej za tryccać dzion paśla pryniaćcia spravy da sudavodstva pravodzić rasparadčaje pasiadžeńnie, pavodle vynikaŭ jakoha vynosić pastanovu, u jakoj pavinien być nazvany, akramia inšaha, čas asnoŭnaha pasiadžeńnia suda. Zajava ŭrada Respubliki Biełaruś była pryniata da sudavodstva 21 krasavika. Sud abaviazan byŭ da 21 maja h.h. pryznačyć datu praviadzieńnia pieršaha pasiadžeńnia dla razhladu spravy pa sutnaści», — havorycca ŭ zajavie.
Rašeńnie suda ab praviadzieńni rasparadčaha pasiadžeńnia 22 červienia i «nievyznačeńnie daty asnoŭnaha razhladu sprečki» supiarečyć rehłamientu i «biezhruntoŭna zaciahvaje sudovy praces».
Miniust adznačaje, što biełaruski bok svoječasova padaŭ pavodle zapytu suda ŭsie nieabchodnyja dla razhladu spravy dakumienty, a taksama šerah «inšych dakumientaŭ, nieabchodnych dla abjektyŭnaha razhladu sprečki». «U svaju čarhu patrabavańni suda ihnarujucca rasijskim bokam (jaje vodzyŭ na biełaruski pazoŭ da hetaha času nie padadzieny). Ale navat heta nie moža źjaŭlacca padstavaj dla nieŭstanaŭleńnia daty asnoŭnaha pasiadžeńnia suda», — havorycca ŭ dakumiencie.
Ministerstva justycyi «nakiravała adpaviedny zvarot» u sud z prośbaj viarnucca da razhladu pytańnia ab dacie asnoŭnaha pasiadžeńnia. «Na našu dumku, z ulikam vidavočnaha praciahu parušeńnia rasijskim bokam svaich mižnarodnych abaviazacielstvaŭ zaciahvańnie sudovaha pracesu niedapuščalna», — adznačajecca ŭ zajavie
