Vizit Makieja adkładzieny, a voś pryjezd lidera apazicyi Alaksandra Milinkieviča adbyŭsia zhodna z hrafikam.
U Dziarždepartamiencie mierkavali «vysłuchać» Makieja, a nie «vieści pieramovy» ź im.
Vyhladaje, što źviestki ab vizicie Makieja ŭ Vašynhton, što źjavilisia na minułym tydni na sajcie Abjadnanaj hramadzianskaj partyi, akazalisia zaŭčasnymi. Pavodle infarmacyi «NN» z amierykanskich krynic, vizit płanavaŭsia, ale ŭžo dvojčy admianiaŭsia.
U aŭtorak Ministerstva finansaŭ ZŠA čarhovy raz praciahnuła rašeńnie ab źmiakčeńni sankcyj u dačynieńni da dvuch biełaruskich pradpryjemstvaŭ kancerna «Biełnaftachim» — AAT «Łakafarba» i «Połack‑Škłovałakno».Jak paviedamlaje aficyjny sajt Minfina, dziejańnie sankcyj prypyniena da 30 listapada 2010 hoda. Va ŭkazany pieryjad amierykanskim hramadzianam dazvolena supracoŭnictva z hetymi biełaruskimi pradpryjemstvami.
U toj ža čas ułasnaść hetych pradpryjemstvaŭ na terytoryi ZŠA zastajecca zabłakavanaj.
Usie astatnija sankcyi ZŠA, uviedzienyja ŭ dačynieńni da kancerna «Biełnaftachim» i pradpryjemstvaŭ, jakija ŭ jaho ŭvachodziać, zastajucca ŭ sile.
Admienu vizitu surazmoŭca «NN» u Vašynhtonie źviazvaje z tym, što Złučanyja Štaty dahetul admaŭlajucca źniać ekanamičnyja sankcyi suprać «Biełnaftachima». U Dziarždepartamiencie mierkavali «vysłuchać» Makieja, a nie «vieści pieramovy» ź im. Heta nie mahło zadavolić biełaruski bok.
Vizit Makieja adkładzieny, a voś pryjezd lidera apazicyi Alaksandra Milinkieviča adbyŭsia zhodna z hrafikam. Jon maje sustrečy va ŭsich ustanovach, što zajmajucca biełaruskim pytańniem, a taksama šerah znakavych sustreč ź viadomymi asobami. Naprykład, jon hutaryŭ z eks‑kandydatam u prezidenty ZŠA Džonam Makiejnam, jaki naležyć da koła sienataraŭ, što vyznačajuć zamiežnuju palityku Štataŭ.
U zajavie pasolstva ZŠA z nahody praciahnieńnia režymu sankcyj havorycca, što «niadaŭnija padziei ŭ liku jakich rejdy suprać niaŭradavych arhanizacyj («Havary praŭdu») na tym tydni, śviedčać pra toje, što dziejańni biełaruskich uład u dačynieńni da asnoŭnych svabod praciahvajuć nasić niehatyŭny charaktar». A palapšeńnie biełaruska‑amierykanskich stasunkaŭ mahčymaje tolki pry ŭmovie «realnaha prahresu ŭ śfiery demakratyi i zachavańnia asnoŭnych pravoŭ čałavieka».
Amierykancy ŭviali takija sankcyi ŭ sakaviku 2008 hoda, kali biełaruskaja ŭłada admaŭlałasia vyzvalić z turmy eks‑kandydata na pasadu prezidenta Alaksandra Kazulina. Tady ž i pačaŭsia dypłamatyčny skandał. U vyniku jakoha pasły byli adklikanyja, jak ź Minska, tak i z Vašynhtona.
Pa siońnia pasolstvy pracujuć u minimalnym składzie. Źmiakčyli sankcyi, darečy, akurat paśla vyzvaleńnia Kazulina i inšych palitviaźniaŭ.
«My ŭvažajem, što hałoŭnaja zadača dvuchbakovych adnosinaŭ — heta demantaž starych zavałaŭ i vychad na novy ŭzrovień kantaktaŭ.
A klučavym momantam tut źjaŭlajecca poŭnaja admiena sankcyj», — vykazaŭ aficyjnaje mierkavańnie pres‑sakratar MZS Andrej Savinych. Tym nie mienš, krok amierykancaŭ byŭ nazvany stanoŭčym.
