Strata pieršaha biełaruskaha spadarožnika Ziamli «BiełKA», jaki ŭsio ž staŭ pieršym spadarožnikam, što nie dalacieŭ arbity, nie nadłamała biełaruskaj navuki. Chutčej, navat navyvarat. Avaryja tolki sparadziła vysoki intares da raboty, praviedzienaj biełaruskimi navukoŭcami i pramysłovymi pradpryjemstvami na praciahu stvareńnia hetaha spadarožnika. A heta značyć, što kłopaty pra zapusk biełaruskaha spadarožnika na arbitu majuć praciahnucca. Prynamsi pra heta na prajšoŭšaj u Miensku presavaj kanferencyi kazaŭ kiraŭnik Nacyjanalnaj akademii navuk Michaił Miaśnikovič.
Takim čynam, jon paviedamiŭ, što ŭžo z Rasiei, Kitaju, Ukrainy pryjšło 9 prapanovaŭ na stvareńnie čarhovaha aparatu. A častka prapanovaŭ zvodziłasia da taho, kab akuratna ŭznavić kłon BiełKi; druhaja častka – da taho, kab stvaryć spadarožnik, skarystaŭšy z apošnich dasiahnieńniaŭ navuki i techniki ŭ sfery zasvajeńnia kosmasu.
Skažam tak, što havorka idzie pra technalohii, jakija kaśmičnyja dziaržavy mohuć pradać Biełarusi. Bo pra apošnija dasiahnieńni i maryć navat nie vypadaje. Hetyja dasiahnieńni pracujuć na Rasieju, ZŠA i častkova na Eŭraźviaz. Tamu kali hałoŭny biełaruski akademik ćvierdzić pra toje, što ŭ śviecie «niama aparataŭ hramadzianskaha pryznačeńnia» napadob novaj BiełKi z dazvolnaj zdolnaściu blizka 0,5–1,0 metra, možna skazać, što toj trochi pierabolšvaje. Ale kančatkovyja vysnovy na hetuju temu naahuł rabić šče zarana. Pavodle Miaśnikoviča, novuju BiełKu zmajstrujuć nie raniej čym praz 2–2,5 hady.
Ale, heta nie navina. Navina – heta toje, što pad novy spadarožnik Biełaruś manicca stvaryć svoj sobski... centar kiravańnia palotami.
«My, – kaža, – budziem imknucca da taho, kab stvarać palotnyja zadačy, pieradavać dadzienyja i kiravać bortam samastojna».
A čaho jašče možna było čakać ad kiraŭnika NAN «niezaležnaje» krainy? Pahatoŭ paśla taho, jak «piaršak» skončyŭ svoj viek na vačoch samoha prezydenta. A pra toje, ci nastupić za CKP budaŭnictva sobskaha kasmadromu, Miaśnikovič detalaŭ nie davaŭ.
