Litva maje namier praciahvać padtrymku Jeŭrapiejskaha humanitarnaha univiersiteta (EHU) da taho času, pakul nie źjavicca mahčymaść adnavić pracu VNU ŭ Minsku. Pra heta zajaviŭ ministr zamiežnych spraŭ Litvy Aŭdronius Ažubalis na 3‑j asamblei donaraŭ Metavaha fondu EHU ŭ Vilniusie.
Jak paviedamlaje pres‑słužba litoŭskaha MZS, ministr zajaviŭ, što rašeńnie Litvy zaprasić EHU u Vilniu «hruntujecca na demakratyčnych kaštoŭnaściach, pavažańni svabody i pravoŭ čałavieka», a misija EHU «biez padtrymki partnioraŭ niemahčyma».
Ažubalis padziakavaŭ pradstaŭnikam Jeŭrakamisii i Savieta ministraŭ Paŭnočnych krain, jakija źjaŭlajucca najbujniejšymi donarami univiersiteta, i vykazaŭ nadzieju, što ich padtrymka nie pamienšycca. «EHU — adzin z najbolš jarkich mižnarodnych prajektaŭ pa akazańni dapamohi demakratyi, realizacyja jakoha stała mahčymaj tolki dziakujučy vašamu ŭniosku», — źviarnuŭsia jon da ŭdzielnikaŭ kanfierencyi donaraŭ.
Kiraŭnik MZS Litvy adznačyŭ, što EHU — «važny centr zachavańnia i raźvićcia biełaruskaj kultury i samabytnaści». Tamu, na jaho dumku, varta pavialičyć kolkaść pradmietaŭ, jakija vykładajucca na biełaruskaj movie.
U 2004 hodzie EHU byŭ zakryty biełaruskimi ŭładami pa palityčnych matyvach. Pavodle zaprašeńnia ŭrada Litvy ŭ 2005 hodzie VNU adnaviła dziejnaść u Vilni, a ŭ 2006 hodzie — atrymała status litoŭskaha univiersiteta. Zaraz u EHU vučycca bolš za 1 tys. 500 biełaruskich studentaŭ.
