Uniesienyja ŭ Vybarčy kodeks Biełarusi papraŭki źjaŭlajucca krokam da ŭstaranieńnia niedachopaŭ, ale nie harantujuć praviadzieńnia adkrytych i demakratyčnych vybaraŭ. Pra heta havorycca ŭ sumiesnaj zajavie ekśpiertaŭ Biuro pa demakratyčnych instytutach i pravach čałavieka (BDIPČ) ABSIE i Vieniecyjanskaj kamisii Rady Jeŭropy.
Poŭny tekst dakumienta raźmieščany na aficyjnym sajcie ABSIE.
«Papraŭki ŭklučajuć u siabie šerah palapšeńniaŭ, pryniatych na padstavie našych rekamiendacyj, jakija my davali ŭ našych minułych acenkach vybaraŭ pavodle vynikaŭ pracy naziralnikaŭ i padčas kansultacyj ź biełaruskimi ŭładami», — adznačyŭ dyrektar BDIPČ ABSIE Janiez Lanarčyč.
Razam z tym jon padkreśliŭ nieabchodnaść dalejšaj pracy pa palapšeńni biełaruskaha vybarčaha zakanadaŭstva. Naprykład, rastłumačyŭ Lanarčyč, «patencyjalna pazityŭny efiekt ad šerahu papravak moža być sapsavany niedachopami ŭ pracedury padliku hałasoŭ».
U svaju čarhu sakratar Vieniecyjanskaj kamisii Tomas Markiet zajaviŭ: adno tolki zakanadaŭstva nie moža harantavać praviadzieńnia vybaraŭ, jakija adpaviadajuć mižnarodnym standartam. «Jakaść nastupnych vybaraŭ u Biełarusi budzie zaležać nie tolki ad dziejnaha zakanadaŭstva. Važna jašče, jak zakanadaŭčaja baza budzie prymianiacca», — padkreśliŭ jon.
Na dumku mižnarodnych ekśpiertaŭ, dla palapšeńnia vybarčaha pracesu ŭ Biełarusi nieabchodna spraścić praceduru rehistracyi kandydataŭ i praviadzieńnia ahitacyjnaj kampanii, dać dadatkovyja harantyi pa praviadzieńni daterminovaha hałasavańnia, dazvolić asprečvać rašeńni Centralnaj vybarčaj kamisii ŭ Viarchoŭnym sudzie.
U zajavie adznačajecca, što ŭ Biełarusi adsutničajuć kryteryi ŭ pracedury vybaru členaŭ vybarčych kamisij.
U dakumiencie asabliva padkreślivajecca, što papraŭki ŭ Vybarčy kodeks tak i nie dali harantyi taho, što naziralniki zmohuć sačyć za praceduraj padliku hałasoŭ.
ABSIE i Vieniecyjanskaja kamisija hatovy da dalejšaha ciesnaha supracoŭnictva ź Minskam pa ŭsich pytańniach refarmavańnia vybarčaha zakanadaŭstva.
BDIPČ ABSIE taksama spadziajecca, što zmoža ŭbačyć efiekt ad uniesienych papravak padčas nazirańnia za prezidenckimi vybarami.
Papraŭki ŭ Vybarčy kodeks byli pryniaty ŭ śniežni 2009 hoda.