Ekśpiert u halinie mižnarodnych spraŭ kamientuje praciah sankcyj ZŠA ŭ dačynieńni da biełaruskich čynoŭnikaŭ.
Krok Abamy staŭ peŭnaj niečakanaściu dla aficyjnaha Minska, miarkuje ekśpiert u halinie mižnarodnych spraŭ Raman Jakaŭleŭski. U aŭtorak źjaviłasia paviedamleńnie pra čarhovaje pasiedžańnie Hramadska-kansultacyjnaj rady pry Administracyi Łukašenki, što musiła stać pazityŭnym sihnałam Zachadu. I, adpaviedna, čakałasia zvarotnaja reakcyja. Jašče daŭniej ZŠA ŭ čarhovy raz zamarozili sankcyi suprać šerahu biełaruskich pradpryjemstvaŭ. I tut taki pavarot. Adnak u lubym vypadku ničoha dobraha z boku administracyi prezidenta Abamy ŭładam Biełarusi čakać nie varta, ličyć R. Jakaŭleŭski.
Asabliva ŭličvajučy fakt biesprecedentnaha supracoŭnictva Vašynhtona i Maskvy na postsavieckaj prastory, što vyliłasia ŭ hvałtoŭnuju źmienu ŭłady ŭ Kyrhyzstanie.
Ekśpiert miarkuje, što i biez taho daloka niaprostyja biełaruska-amierykanskija adnosiny ŭ bližejšy čas lepšymi nie stanuć. «Prynamsi, novaha pasła i pašyreńnia štatu pasolstva ZŠA ŭ Minsku pakul čakać nie varta».
Raman Jakaŭleŭski vykazaŭ kolki zdahadak nakont pryčyn padaŭžeńnia sankcyj. Najpierš, ličyć jon, ZŠA byli i zastajucca pryncypovymi abaroncami pravoŭ čałavieka i svabody słova. Što da administracyi Abamy, jakaja praciahnuła spravu papiarednikaŭ u dačynieńni da biełaruskich čynoŭnikaŭ, to «Abama bolš maŭčyć, ale svaju spravu robić».
Ekśpiert ukazvaje i na kankretnyja vypadki, jakija mahli padšturchnuć ZŠA da rašučych dziejańniaŭ.
«U minułym miesiacy prajšła infarmacyja pra mahčymy vizit Uładzimira Makieja ŭ ZŠA, jakaja potym nie paćvierdziłasia. Jość peŭnyja padstavy mierkavać, što heta była «kačka», zapuščanaja ź Biełarusi, — kaža Jakaŭleŭski. — Ale Makieja tam čakali, a jon nie pryjechaŭ».Čamu nie pryjechaŭ? Bo nie było čaho skazać, miarkuje ekśpiert. Dyjałoh ź Jeŭropaj skončyŭsia ni čym, pravy čałavieka pa-raniejšamu parušajucca, prablemy ź niezaležnaj presaj zastajucca.
Jašče adnym razdražnialnikam dla Vašynhtona moh stać raptoŭny i tajamničy vizit kiraŭnika biełaruskaha MZS Siarhieja Martynava ŭ Siryju,ź jakoj u nas, kažučy aficyjnaj movaj, «asablivyja adnosiny». Heta nie mahło nie naściarožyć ZŠA, bo Siryja fihuruje ŭ śpisie krain, što padtrymlivajuć mižnarodnych terarystaŭ.