Pasoł FRH Hiebchart Vajs, jaki zaviaršaje svoj mandat u Biełarusi, paviazie z saboj «nie tolki padarunki, ale i ŭsie sihnały razumieńnia, padtrymki i lubovi, usio samaje kaštoŭnaje».
Vystupajučy 22 červienia ŭ Minsku z nahody zakančeńnia paŭnamoctvaŭ i dypłamatyčnaj kar`iery ŭ suviazi z vychadam na piensiju, Vajs adznačyŭ, što śviadoma vybraŭ hetuju datu dla pryjomu. «U hety dzień 69 hadoŭ tamu mirnyja žychary Minska ŭziali ŭdzieł u adkryćci Kamsamolskaha voziera i nie viedali, što pačałosia na zachadzie, a ŭviečary, kali vystupaŭ MCHAT, u antrakcie daviedalisia, što pačałasia vajna», — skazaŭ pasoł.
Pavodle słoŭ kiraŭnika dypmisii FRH, za «złačynnym napadam adbyłosia vyzvaleńnie Jeŭropy i Hiermanii ad fašystaŭ i raździaleńnie Jeŭropy i Hiermanii», što vyznačyła jaho prafiesijny vybar.
Vajs zajaviŭ, što ŭ svajoj prafiesijnaj kar`iery, u pryvatnaści ŭ Biełarusi,
kiravaŭsia kancepcyjaj hiermanskaha kanclera Vili Branta «hruntavacca na dyjałohu, supracoŭnictvie, pavazie i ŭzajemapavazie».
Dypłamat padziakavaŭ biełarusam za «razumieńnie, padoranaje supracoŭnictva, dapamohu va ŭsich adnosinach» i pažadaŭ mudraści ŭsim palityčnym łahieram Biełarusi.
Pieršy namieśnik ministra zamiežnych spraŭ Biełarusi Ihar Pietryšenka adznačyŭ, što za pieryjad pracy Vajsa palepšylisia adnosiny Minska i ES, Minska i Bierlina. «Vašu rolu ŭ hetych pracesach ciažka pieraacanić», — skazaŭ pradstaŭnik MZS. Jon adznačyŭ pazicyju niamieckich uładaŭ adnosna admieny zabarony na kantakty z vysokimi pradstaŭnikami Biełarusi ŭ ES, uklučeńnia Biełarusi ŭ palityku ES «Uschodniaje partniorstva», a taksama «karennuju źmienu adnosinaŭ u kirunku prahmatyčnaha dyjałohu i atmaśfiery davieru».
Pietryšenka ŭkazaŭ na «trapiatlivaje staŭleńnie» Vajsa da vajennaj spadčyny i asabisty ŭniosak u pieradaču kopij archiŭnych dakumientaŭ biełaruskich sałdat, jakija byli ŭ pałonie i pachavany ŭ Hiermanii.
Pavodle jaho słoŭ, u niamieckaha dypłamata ŭ Biełarusi
zastajucca «sotni, tysiačy siabroŭ», i jaho vopyt i nievyčerpnaja enierhija buduć zapatrabavany dla naładžvańnia adnosinaŭ pamiž FRH i jaje ŭschodnimi partniorami.
Ad pierajemnika Vajsa biełaruski bok čakaje «praciahu i pašyreńnia stanoŭčych tendencyj u padychodach dla pašyreńnia supracoŭnictva Biełarusi i Hiermanii, dyjałohu Biełarusi i ES».
Duajen dypłamatyčnaha korpusu ŭ Biełarusi, pasoł Paleściny Muntasier Abu Ziejd adznačyŭ vydatnuju pracu Vajsa i pažadaŭ jamu dalejšych pośpiechaŭ.