Na minułych vychadnych u Homielskaj vobłaści adbylisia čatyry niaščasnyja vypadki ź dziećmi, pakinutymi biez nahladu darosłych.
Jak paviedamiŭ pres‑sakratar Homielskaha abłasnoha ŭpraŭleńnia MNS Rusłan Habryloŭ, 4 lipienia ŭ Rahačovie pakinuty biez nahladu dvuchhadovy chłopčyk atrymaŭ apioki II i III stupieniaŭ 35% cieła. Dzicia znachodzicca ŭ reanimacyi Rahačoŭskaj rajonnaj balnicy. Vyśvietliłasia, što viečaram taho dnia mały hulaŭ biez nahladu darosłych u aŭtamabili «Falskvahien», znajšoŭ tam zapałki i padpaliŭ abšyŭku siadzieńnia. Baćka chłopčyka zaŭvažyŭ, što mašyna haryć adkrytym połymiem, evakujavaŭ syna i likvidavaŭ pažar. U balnicy vyśvietliłasia, što ŭ paciarpiełaha chłopčyka abpaleny tvar, šyja, hałava, pieradplečča.
Pavodle słoŭ Habrylova,
2 lipienia ŭ reanimacyju Mazyrskaj haradskoj balnicy była dastaŭlena dvuchhadovaja dziaŭčynka z apiokami abiedźviuch stupniaŭ. Ustanoŭlena, što traŭmu dziaŭčynka atrymała kala svajho doma ŭ vioscy Huryny. Dzicia, hulajučy kala doma, nastupiła na vohnišča — dniom raniej baćki tut spalvali śmiećcie.
Pavodle źviestak pres‑słužby UUD Homielskaha abłvykankama, 2 lipienia ŭ 22.25 u Vietkaŭskuju balnicu z apiokami II i III stupniaŭ, tvaru, ruk, piaredniaj pavierchni hrudnoj kletki, ściohnaŭ dastaŭleny čatyrochhadovy chłopčyk, žychar vioski Załaty Roh. Ustanoŭlena, što apioki atrymaŭ pry kupańni pa miescy žycharstva, kali ŭpaŭ u viadro z varam. Chłopčyka špitalizavali ŭ Homielskuju haradskuju balnicu № 1.
4 lipienia z Homielskaj abłasnoj kliničnaj balnicy pryjšło paviedamleńnie, što da ich była dastaŭlena z zakrytaj čerapna‑mazhavoj traŭmaj, udaram hałaŭnoha mozhu adnahadovaja dziaŭčynka, jakaja žyvie ŭ vioscy Dziatłavičy Homielskaha rajona. Sa słoŭ baćkoŭ, dzicia vypała z akna druhoha paviercha ich kvatery. Pravierku pravodzić prakuratura.
