U Pałacy mastactvaŭ (Kazłova, 3) raspačaŭsia tradycyjny fest sučasnaha mastactva «DACH».
 |
Mižnarodny fiestyval ekśpierymientalnaha mastactva «DACH» upieršyniu prajšoŭ u 2001 h. u bierlinskim centry «Tachieles». Z taho času amal kožny hod hety fest ładzicca to ŭ Bierlinie (u žyłym domie, pieratvoranym u adnu vialikuju vystavačnuju zału), to ŭ Minsku (u adnosna reśpiektabielnym Pałacy mastactvaŭ) i niaźmienna źbiraje pad svoj dach tych, chto nie curajecca ekśpierymientavać u roznych kirunkach mastactva.
Sioletni fest prachodzić pad kodavym nazovam MAGEIA CEREBRUM («Ciomnyja tajamnicy mozhu»). Raściahnuty na ceły miesiac fiestyval paznajomić naviednikaŭ z tvorčaściu tych mastakoŭ, jakija ekśpierymientujuć sa słovam, hukam, žestam, farbaj. Ekspazicyja na praciahu fiestyvalu źmienicca try razy. Muzyki, litaratary, pierformiery i teatralnyja supołki buduć čarhavacca bieśpierapynna…
Sama cikavyja imprezy pieršaha fiestyvalnaha tydnia:
 «Miechaniory Kultury |
13 lipienia, aŭtorak. Pierformans ad «Miechanioraŭ kultury». Teatr pierformansu (nazaviem jaho tak) «Miechaniory kultury" zładziŭ blizu piacidziesiaci pierformansaŭ (i nie zładzili jašče bolš). Miechaniory - majstry bojki z młynami. Zamiest vietraka – Jaje Vialikaść Kultura, jakaja ŭžo kolki hadoŭ, pavodle miechanioraŭ, «varušyć svaimi pavučynymi kancavinami». MK časam siam-tam čaho-niebudź cyrujuć, padbivajuć, vypraŭlajuć, kab hety hmach zmoh dažyć da samaha Kanca. Miechaniory isnujuć u kožnaj krainie śvietu (a siarod ich jość i biełaruski mastak, minčuk-bierliniec Aleś Rodzin), adnak epicentr zaŭsiedy znachodzicca ŭ Biełarusi. Pačatak a 18-j. Prychodźcie: viedajučy MK, možna skazać, što budzie tajamničaje i ŭračystaje dziejstva.
 |
15 lipienia, čaćvier. Prajekt «Fiłamaty-Fiłarety». Bard Alaksiej Žbanaŭ i siabry niečakana dałučylisia da festu sučasnaj kultury. Čamu niečakana? Bo jahony prajekt — heta danina kłasičnamu bardaŭskamu vykanańniu. Što robić jaho admietnym, dyk heta pierakłady vieršaŭ fiłamataŭ i fiłaretaŭ na biełaruskuju movu: Adama Mickieviča, Jana Čačota dy inš. Aŭtary ŭvodziać tvorčaść fiłamataŭ i fiłaretaŭ z dapamohaj bardaŭskaj pieśni, uznaŭlajuć pierarvanuju poviaź kultury, sprabujuć pieraadoleć štučnuju miažu pamiž biełaruskamoŭnaj narodnaj i polskamoŭnaj šlachieckaj kulturaj Biełarusi XIX st.
 |
16 lipienia, piatnica. Padlašskaje kino. Padlašša – kraj polska-biełaruska-ŭkrainskaha sužyćcia, dzie sudakranajucca kultury. Supołka Filmowe Podlasie Atakuje/«Kinapadlašša atakuje!» prezientuje čarhovy zbornik karotkamietražnych stužak svaich siabroŭ, jakija zdabyli pryzy na raznastajnych kinafestach, a taksama stužki pačatkoŭcaŭ. Pačatak a 16-j.
 Viera Burłak u roli... |
19 lipienia. «Kabare Matyldy Štor" - Dostoevskij coming back/«Dastajeŭski viartajecca». KMŠ – biełaruski dekadans. Impazantnyja litaratary Viera Burłak, Viktar Žybul i Maksim Iŭkin vykonvajuć aryhinalnyja prypieŭki, vieršy. Siabie ličać naŭprostavymi spadkajemcami adeskich kupletystaŭ, stvaralnikaŭ kabackich pieśniaŭ i maestra Viarcinskaha. Dastajeŭski pačnie viartacca a 16-j.
 Anna Hierasimava |
21 lipienia, sierada. Umka i Bronievik. Litaraturnaja viečarynka vydaviectva «Halijafy» z udziełam Volhi Hapiejevaj, Arcioma Kavaleŭskaha, Viery Burłak, Viktara Žybula, Źmitra Plana, Siarhieja Kalendy, Usievałada Harački, Viki Trenas, Michasia Bašury, Źmitra Višniova spałučycca z kancertam kłasikaŭ rasijskaha roku «Umka i Bronievik». Pieśni Umki (u žyćci – viadomaj rasijskaj pierakładčycy z anhielskaje i litoŭskaje Anny Hierasimavaj) – intelektualny rytm-end-bluz, jaki časta paraŭnoŭvajuć z amierykanskim psichadeličnymi hurtami 70-ch. Kali koliś zładziać rasijski Vudstok – dyk UiB, peŭna, buduć tam za chedłajniera. Pačatak a 20-j.
