Ukraina i Biełaruś hetym letam išli na raźmiaščeńnie jeŭrabondaŭ amal sinchronna. Kijeŭ mieŭ namier sioleta vypuścić dziesiacihadovyja ablihacyi na 2 młrd dalaraŭ, Minsk płanuje debiutavać vypuskam piacihadovych jeŭrabondaŭ na sumu da 1 młrd dalaraŭ. Ukraina vyrašyła ad vypusku jeŭraablihacyj admovicca. Ci stanie heta sihnałam dla Biełarusi?
Darahaja raskoša
Minfin Ukrainy 15 lipienia padvioŭ rysu pad prajektam, padziakavaŭ inviestaram za cikavaść i praduktyŭnyja sustrečy i admoviŭsia ad raźmiaščeńnia, "uličvajučy inšyja mahčymyja krynicy finansavańnia i pazicyju likvidnaści". Pry hetym Kijeŭ adznačyŭ, što mahčymaść zamiežnych pazykaŭ razhladajecca pastajanna z ulikam patrebaŭ krainy i rynkavaj situacyi.
Reuters udakładniŭ, što "Ukrainu nie zadavolili cenavyja ŭmovy, jana spadziajecca na alternatyŭnyja krynicy finansavańnia, jakija mohuć być dla jaje tańniejšymi".
Samaja vidavočnaja "alternatyŭnaja krynica" dla Kijeva — heta Mižnarodny valutny fond. Pieramovy z novym kiraŭnictvam Ukrainy prajšli paśpiachova, i ŭ pačatku lipienia na ŭzroŭni ekśpiertaŭ baki damovilisia ab vydačy Ukrainie pazyki na ŭnušalnuju sumu — 14,9 młrd dalaraŭ. Pieršy tranš u 1,3 młrd (całkam supastaŭny ź mierkavanym vypuskam jeŭraablihacyj) Ukraina moža atrymać u najbližejšy čas. Praŭda, dla hetaha vydzialeńnie srodkaŭ jašče pavinien uchvalić Saviet dyrektaraŭ fondu, ale takaja ŭchvała moža być atrymanaja jašče da kanca miesiaca.
Srodki ad MVF, choć i vydzialajucca zvyčajna pad nie zusim pryjemnyja dla pazyčalnika ŭmovy nakštałt makraekanamičnych reformaŭ, vydajucca pad nievysoki pracent.Da prykładu, papiaredni kredyt ad MVF Ukraina atrymlivała ŭ kastryčniku 2008 pad 4%, a piacihadovyja jeŭrabondy apošnim razam, u 2007, kraina raźmiaščała z kuponam 6,385% hadavych. Ciapierašniaja pazyka čakałasia pad 6-7%.
Doraha, ale miła
Ci stanie rašeńnie susiedziaŭ sihnałam dla Biełarusi? Ekśpierty pahadžajucca na tym, što paŭtareńnie ŭkrainskaha scenaru zusim nie abaviazkovaje.
"Biełarusi patrebnyja srodki, vyłučeńnie jakich nie supravadžałasia b dadatkovymi patrabavańniami, da prykładu, pa refarmavańni ekanomiki.
MVF nie suprać praciahu supracoŭnictva ź Biełaruśsiu, ale adnym ź pieršych patrabavańniaŭ pry realizacyi novaj prahramy budzie abmiežavańnie rostu zarabotnaj płaty. A ŭ Biełarusi napiaredadni vybaraŭ pavieličeńnie siaredniaha zarobku da 500 dalaraŭ traplaje ŭ lik pryjarytetnych zadač.Tak što ciapier dla Biełarusi bolš pažadanyja daražejšyja resursy, ale biez dadatkovych abaviazkaŭ", — adznačyŭ finansavy analityk Alaksandr Mucha.
Jon padkreśliŭ, što ŭkrainskaje rašeńnie ab admovie ad raźmiaščeńnia zusim nie aznačaje, što pa hetym ža šlachu moža rušyć Biełaruś. "Byli sustrečy Ukrainy ź inviestarami, jakija vydatkavali svoj čas, chtości zareziervavaŭ srodki, a ptym — admova... Tak što možna mierkavać, što vierahodnaść paśpiachovaha debiutu dla Biełarusi ŭ hetych umovach navat uzrastaje".
Pavodle acenki Alaksandra Muchi, Biełaruś moža raźmiaścić jeŭrabondy pad 7-7,5%. "Takaja staŭka vyhladaje realnaj. U pryncypie, dla nas heta doŭhija i kamfortnyja hrošy, z ulikam ciapierašniaha ŭzroŭniu krainavaha kredytnaha rejtynhu Biełarusi. Tym bolš što havorka idzie pra debiut krainy na hetym rynku. Dalej možna raźličvać na źnižeńnie stavak, ale važna vyjści na hety rynak", — adznačyŭ jon.
Ekanamist Siarhiej Čały ŭ svaju čarhu źviarnuŭ uvahu na toje, što kanjunktura ciapier nie samaja ŭdałaja dla zamiežnych pazykaŭ. "Realnaja staŭka dla Biełarusi ciapier kala 9%. I kali nam patrebnyja zamiežnyja pazyki, nichto nie pieraškadžaje Biełarusi, hetak ža, jak Ukrainie, praciahnuć supracoŭnictva z MVF", — skazaŭ ekśpiert.
Zhodna z pastanovaj Saŭmina № 1031 ad 9 lipienia z 11 pa 17 lipienia ŭ Zachodniaj Jeŭropie budzie znachodzicca biełaruskaja delehacyja na čale z kiraŭnikami finansavaha i ekanamičnaha błokaŭ uradu. U pryvatnaści, u jaje ŭvajšli pieršy namieśnik staršyni praŭleńnia Nacbanka Juryj Ałymaŭ, ministr finansaŭ Andrej Charkaviec i ministr ekanomiki Mikałaj Snapkoŭ. Jany pabyvajuć u Łondanie, Frankfurcie-na-Majnie, Miunchienie, Ciurychu i Ženievie.
Biełaruś hatovaja ŭ 2010—2011 vypuścić jeŭraablihacyi na sumu da 2 młrd dalaraŭ z terminam viartańnia nie mienš za 5 hadoŭ. Urad Biełarusi pryznačyŭ u jakaści sumiesnych arhanizataraŭ pa raźmiaščeńni jeŭraablihacyj BNP Paribas, Deutsche Bank AG, The Royal Bank of Scotland plc i “Śbierbank” Rasii.
***
Jeŭraablihacyi (abo jeŭrabondy — ad anhł. Eurobonds) — raznavidnaść doŭhaterminovych kaštoŭnych papier. Heta ablihacyi vypuščanyja, jak praviła, u zamiežnaj dla emitenta valucie i pryznačanyja dla pryciahnieńnia kapitału na mižnarodnym rynku. Prystaŭka "ieŭra" ŭ słovie "ieŭraablihacyi" — danina tradycyi, bo hetyja papiery źjavilisia ŭ Jeŭropie. Siońnia jeŭraablihacyi atrymali dastatkova šyrokaje raspaŭsiudžańnie jak inviestycyjny instrumient, aptymalny pa suadnosinach "nadziejnaść/prybytak". Vypusk jeŭraablihacyj dazvalaje pazyčalniku pryciahvać bolš bujnyja sumy, čym na ŭnutranym rynku, pad adnosna nizkija staŭki. Pazyčalnikami, jakija vypuskajuć jeŭrabondy, vystupajuć ŭrady, karparacyi, mižnarodnyja arhanizacyi, zacikaŭlenyja ŭ atrymańni hrašovych srodkaŭ na doŭhi termin.
