Kłub bahaciejaŭ Dźmitryja Łukašenki

«Niekamiercyjny» Prezidencki spartyŭny kłub buduje žyły rajon i kantraluje łatarei. I tracić bolš za $2,5 miljony na dabračynnaść.

Na toje, što Prezidencki spartyŭny kłub — faktyčna pryvatnaja łavačka, namiakaje termin praviadzieńnia ahulnaj sustrečy. Zhodna sa statutam, kiraŭnictvu dastatkova raicca ź inšymi ŭdzielnikami abjadnańnia pa intaresach raz na piać hadoŭ. Pieršaja sustreča adbyłasia navat trochi paźniej ad času zasnavańnia. Na joj była vybudavanaja ijerarchija arhanizacyi. Kiraŭnikom vybrali siaredniaha prezidenckaha syna Dźmitryja Łukašenku, a ŭ CK trapili starejšy syn Viktar, upłyvovy biznesoviec Juryj Čyž, staršynia Minskaha harvykankama Mikałaj Ładućka i jašče šeść byłych spartoŭcaŭ i funkcyjanieraŭ.

Ale čyja ž heta łavačka jurydyčna? «Respublikanskaje dziaržaŭna-hramadskaje abjadnańnie» — čort nahu złomić. Admietna, što na sajcie arhanizacyi niemahčyma znajści nivodnaha fotazdymka choć kahości z kiraŭnictva, aproč samoha Alaksandra Łukašenki, jaki farmalna dačynieńnia da kłuba nie maje.

Stvarali niekamiercyjnuju arhanizacyju, ale vyjšła niešta nie toje…

«Biełaruskija spartoŭcy, vieterany sportu, treniery, kiraŭniki i vykładčyki spartovych škoł u lipieni 2005 abjadnalisia ŭ niekamiercyjnuju arhanizacyju, kab padtrymać fizkulturna-azdaraŭlenčy ruch u krainie, stvaryć nieabchodnyja ŭmovy dla zaniatkaŭ sportam i fizičnaj kulturaj, arhanizacyi aktyŭnaha adpačynku», — kaža lehienda arhanizacyi. Jakim bokam tady ŭ jaje trapili čynoŭniki i kali jana stała kamiercyjnaj, hramadskaści prasačyć nie ŭdałosia.

Dźmitryj Łukašenka nie staŭ chavać prybliznych finansavych strataŭ arhanizacyi — $1,3 miljona na praviadzieńnie dziciačych i padletkavych spartyŭnych spabornictvaŭ. Amal stolki ž — na stypiendyi 500 atletam. Toje, što možna nazvać faktyčna dabračynnaściu.

Ale Prezidencki spartyŭny kłub — ustanova nadzvyčaj aktyŭnaja nie tolki ŭ spartyŭnym płanie, jak vynikaje z nazvy. Aproč abstraktnaj prapahandy zdarovaha ładu žyćcia, u jaho jość i kankretnyja biznes-prajekty.

«Adkul hrošy, Dzima?»

Prezidencki syn lubić padkreślivać, što jahonaja arhanizacyja isnuje nie za košt biudžetu. Maŭlaŭ, dachody — unioski partnioraŭ i sponsaraŭ, a taksama pradprymalnickaja dziejnaść.

Samy ambitny prajekt, u realizacyi jakoha ŭdzielničaje «Kłub» Łukašenki-siaredniaha, — $800-miljonny žyły kompleks «Notynhiem». Śpiecyjalisty nazyvajuć jaho najbujniejšaj budoŭlaj paśla «Minsk-Sici» i «Majaka Minska».

Inviestar i budaŭnik — kampanija «Juniviest-M» i jaje daččynaje pradpryjemstva «Juniviestbudinviest». Start prajektu musić być dadzieny ŭ 2010. Niepadalok ad pasiołka Kałodziščy, što na ŭschod ad Minska, na terytoryi 290 ha pačnuć budavać zvyšelitny małapaviarchovy pasiołak. Płanujecca pabudavać bolš za 850 tysiač kvadratnych mietraŭ žylla dla 21 tysiačy čałaviek. Da novaha rajona pabudujuć novuju šyračeznuju trasu, jakaja skryžujecca z MKAD i stanie praciaham vulicy Vaŭpšasava.

Jak chvalacca architektary, dla vykarystańnia nazvy «Notynhiem» spatrebiłasia aficyjnaje ŭchvaleńnie haradskoha savieta adnajmiennaha anhlijskaha horada, jaki źjaŭlajecca pabracimam Minska. Choć šmat kamu nahadvaje karaleŭski Viersal pad Paryžam.

«Dabro» na budaŭnictva atrymanaje i ad Mikałaja Ładućki. Nahadajem — jašče adnaho kiraŭnika «Kłuba». Kali były staršynia Minharvykankama Michaił Paŭłaŭ nie vitaŭ stvareńnie małapaviarchovych rajonaŭ, to Ładućka stavicca da ich pryjazna.

Łatarei kampanii «Sport-Pary» — heta «Sportłato» i «Kiena». Dźmitryj Łukašenka vałodaje imi razam z kampanijaj adnaho z najbahaciejšych biełaruskich biznesoŭcaŭ Uładzimira Piefcijeva «BT Telekamunikacyi». Niahledziačy na šmatlikuju rekłamu, biełarusy słaba adreahavali na novyja elektronnyja hulni.

ZAT «Handlovy dom «BiełAZ» maje ekskluziŭnaje prava na prodaž pradukcyi BiełAZa na terytoryi Rasii. Niaŭžo biez dapamohi Prezidenckaha spartyŭnaha kłuba samazvały nie pradavalisia za ŭschodniuju miažu?

«Pieršaja ŭzornaja drukarnia» — jašče adno stvareńnie prezidenckaha syna. Uziaŭšy za nazvu stary rasijska-saviecki brend — takaja drukarnia isnavała z kanca XIX stahodździa, — Dźmitryj Łukašenka tolki pačynaje raskručvać svoj prajekt. Pry adpaviednym łabijavańni kampanija možna chutka vyjści na pieršyja miescy ŭ krainie.

Voś tak «dziaržaŭna-hramadskaje» abjadnańnie pacichu pieratvarajecca ŭ mahutnuju biznes-hrupoŭku.