Hienadź Buraŭkin. Začarovanaja maja 1

Viadomy paet i dziaržaŭny dziejač Hienadź Buraŭkin adznačyŭ svoj 74-y dzień naradžeńnia. Paet, jaki naradziŭsia ŭ svaim paŭnočnym krai na Spleńnie, kaža, što jamu i pišacca najlepš u hetyja letnie-asiennija dni. I na hety dzień iznoŭ jon nie tolki prymaŭ haściej, ale i pracavaŭ na svajoj prydarožnaj dačy ŭ Kryžoŭcy.

Buraŭkina viedajuć pa jahonaj kałychancy «Pakrysie na rasie…», pa pieśniach «Bieły śnieh» «Vierasoŭ» i «Začarovanaja maja» «Pieśniaroŭ». Mienš viedajuć pra jahonuju nadzvyčajnuju rolu ŭ farmavańni nacyjanalnaj śviadomaści ŭ 1970-80-ja.

Mnohaja leta, šmat novych vieršaŭ i novaj roli ŭ dziaržaŭnym budaŭnictvie zyčym jamu i my. A Vašaj uvazie prapanujem kłasičny vierš paeta.

Začarovanaja maja

Patuchajuć, ciamniejuć vysi,
Zorki ŭspychvajuć nad siniavoj.
Da plača majho prytulisia
Załatoju svajoj hałavoj.

Čuješ — viecier, čuješ — viečar,
Čuješ — cicha šapoča sad.
Na tvaje chudzieńkija plečy
Asypaje noč zarapad.

Prypieŭ:

Heta ja z taboj viečaruju,
Tumanami ciabie ja čaruju,
Vasilkoŭ šapatlivaju movaju
Začaroŭvaju, začaroŭvaju,
Zakałychvaju ja ciabie.

I ad ruk niaŭmiełych, niaśmiełych
Nie schavaješsia ty nidzie,
Poŭnia biełaja jabłykam śpiełym
Na dałoni tvaje ŭpadzie.

Ty šapnieš mnie adčajnyja słovy,
Što šaptaŭ tabie ŭčora ja,
Viečarovaja, začarovanaja,
Zakałychanaja maja.

0

0

0

0

0

0

Mikoła Buhaj

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH