Dla pieršakłaśnicy Śviety Astroŭskaj składuć indyvidualnuju prahramu ŭ 32-j škole, a jaje baćkoŭ za "niesankcyjanavanaje" patrabavańnie biełaruskamoŭnaha kłasa buduć sudzić.
Za tydzień ahitacyi na baćkoŭskich schodach prafiesar Aleś Astroŭski nie znajšoŭ žadajučych addać svajo dzicia ŭ biełaruskamoŭny kłas. Zatoje administracyja 32-j siaredniaj škoły prapanavała kampramis: dla jaho dački bolšaść pradmietaŭ buduć vykładać pa-biełarusku. Uroki malavańnia, rytmiki i fizkultury jana budzie naviedvać razam ź inšymi dziećmi. Tak Śvieta budzie vučycca bližejšyja 4 hady.
Łajalnaje staŭleńnie miascovych čynoŭnikaŭ nie źniało administratyŭnaj adkaznaści za niesankcyjanavany pikiet 2 vieraśnia, kali siamja Astroŭskich patrabavała biełaruskamoŭnaha kłasa pad ścienami harvykankama.
Alesia Astroŭskaha buduć sudzić za arhanizacyju niedazvolenaj akcyi. Jahonaj žoncy Aksanie i žurnalistu Ŭładzimiru Chilmanoviču inkryminujuć udzieł u "niezakonnym pikiecie".
Aleś Astroŭski kaža, što ŭžo ź viasny jon pačnie ahitacyju baćkoŭ na budučy navučalny hod. Kali žadajučych znoŭ nie znojdziecca, pa indyvidualnaj prahramie budzie vučycca jaho siaredni syn Janka. Jon idzie ŭ škołu nastupnaj vosieńniu.
Nahadajem, biełaruskamoŭny kłas z adnoj vučanicaj pracuje ŭ Mahilovie. Hod tamu byccam by z-za ekanomii srodkaŭ anałahičny kłas zakryli ŭ Žodzina.