Pieršy dyjahnaz doktara časta źjaŭlajecca pamyłkovym, tamu što ŭ miedyka prosta nie chapaje času na staranny zbor źviestak. Da takoj vysnovy pryjšła hrupa aŭtarytetnych ekśpiertaŭ. U viadomym brytanskim časopisie British Miedisal Journal byŭ apublikavany artykuł, aŭtar jakoj prafiesar Hordan Kałdvieł krytykuje mietady dyjahnostyki, pryniatyja ŭ sučasnych uračoŭ. Doktar Kałdvieł śćviardžaje, što bolšaść miedykaŭ pry pieršaj sustrečy z pacyjentam staviać rabočy dyjahnaz, u adpaviednaści ź jakim i pravodziać lačeńnie. Ale hety dyjahnaz časta źjaŭlajecca pamyłkovym.
— Nastupstvy takoha lačeńnia mohuć być vielmi surjoznyja, — kaža vopytny lekar i navukoviec. — Naprykład, kali pacyjenta paśla rabočaha dyjahnazu "lohačnaja embalija" lačyć adpaviednym čynam, a na samaj spravie pacyjent chvory na pnieŭmaniju, to takoje lačeńnie moža zaviaršycca latalnym zychodam. Klučavoje pytańnie — heta čas dla pastanoŭki dyjahnazu. Vielmi časta jaho nie chapaje. Ja ŭ svajoj karjery naziraŭ šmat vypadkaŭ, kali z-za śpieški ŭračy stavili pamyłkovy dyjahnaz, što pryvodziła da ciažkich nastupstvaŭ i śmierci chvorych. Čaściej za ŭsio takija pamyłki robiacca va ŭmovach, kali zapisy ab stanie zdaroŭja pacyjenta adsutničajuć abo znachodziacca ŭ biazładnym stanie, vyniki testaŭ nie ŭdajecca pahladzieć ci ŭračy śpiašajucca chutčej vyzvalić balničnyja łožki, vypisvajučy ludziej dadomu. My pavinny pierahledzieć ałharytmy pryjomu i ahladu chvorych. Heta hałoŭnaje, ad čaho zaležać šancy pacyjenta na vyžyvańnie. Uračy abaviazanyja mieć dastatkovuju kolkaść času dla pastanoŭki dyjahnazu i płanavańnia lačeńnia. My abaviazany zabiaśpiečyć daktaroŭ i časam, i prastoraj, i infarmacyjaj.
Miž inšym, kolkaść skarhaŭ na miedycynskaje absłuhoŭvańnie va ŭstanovach Nacyjanalnaj słužby achovy zdaroŭja Vialikabrytanii (NHS) dasiahnuła rekordnaha ŭzroŭniu: u 2009—2010 hadach va ŭstanovy achovy zdaroŭja było nakiravana 101,7 tysiačy piśmovych zvarotaŭ niezadavolenych pacyjentaŭ. Rost kolkaści skarhaŭ u paraŭnańni z papiarednim spravazdačnym pieryjadam skłaŭ 13,4 pracenta. Heta źjaŭlajecca rekordam za ŭvieś čas nazirańniaŭ. Adpaviednyja pakazčyki fiksujucca ŭ krainie na praciahu 12 hadoŭ. Pa źviestkach infarmacyjnaha centra NHS, 44,3 pracenta skaržnikaŭ vykazvali niezadavolenaść uračami, 22 pracenty — pracaj siaredniaha miedycynskaha piersanału i 9 pracentaŭ — administratarami miedycynskich ustanoŭ.
Kiraŭnik Asacyjacyi pacyjentaŭ Vialikabrytanii Ketryn Merfi nazvała hetu infarmacyju vielmi tryvožnaj. Pa jaje słovach, statystyka zvarotaŭ na "haračuju liniju" asacyjacyi taksama śviedčyć pra rost niezadavolenaści nasielnictva ŭzroŭniem miedycynskaha absłuhoŭvańnia. Niezadavolenyja jakaściu miedycynskaha absłuhoŭvańnia i pacyjenty na postsavieckaj prastory. Tak, apytańnie, praviedzienaje ŭ bujnych rasijskich haradach, pakazała, što 80 pracentaŭ rasijan nie naviedvajuć urača pry kožnym zachvorvańni. Vyśvietliłasia, što žychary bujnych rasijskich haradoŭ chvarejuć u siarednim dva razy ŭ hod, pry hetym tolki 15 pracentaŭ apytanych źviartajucca pa dapamohu da ŭrača pry kožnaj chvarobie. Asnoŭnaj pryčynaj, pa jakoj rasijanie nie źviartajucca pa miedycynskuju dapamohu, źjaŭlajecca niežadańnie naviedvać municypalnuju palikliniku z-za vialikich čerhaŭ da ŭračoŭ, nizkaj jakaści absłuhoŭvańnia, niekampietentnaści miedykaŭ i prablem z zapisam na pryjom — taki adkaz dali 35 pracentaŭ udzielnikaŭ apytańnia. Taksama siarod pryčyn, pa jakich rasijanie nie źviartajucca pa miedycynskuju dapamohu, nazyvałasia schilnaść da samalačeńnia (na jaje ŭkazali 16 pracentaŭ respandentaŭ), zvyčka źviartacca da ŭrača tolki ŭ krajnim vypadku (14 pracentaŭ) i adsutnaść času zajmacca ŭłasnym zdaroŭjem (12 pracentaŭ). Akramia taho, u chodzie apytańnia byli ahučanyja i takija pryčyny, jak najaŭnaść znajomych uračoŭ, adsutnaść hrošaj na lačeńnie, strach pierad miedykami, adsutnaść patreby ŭ listku niepracazdolnaści i lačeńnie narodnymi srodkami.
