Inicyjatyŭnaja hrupa Alaksandra Łukašenki źbiare dastatkova podpisaŭ dla jaho vyłučeńnia kandydatam u prezidenty. Pra heta zajaviŭ kiraŭnik hrupy ministr adukacyi Alaksandr Radźkoŭ, adkazvajučy na pytańni žurnalistaŭ pierad pačatkam sieminara Minskaj abłasnoj arhanizacyi RHA «Biełaja Ruś», jakoje jon uznačalvaje.
Pavodle słoŭ Radźkova, u inicyjatyŭnuju hrupu ŭvachodziać rabočyja, intelihiencyja, moładź, viadomyja ludzi, u tym liku kiraŭniki navučalnych ustanoŭ, pradpryjemstvaŭ. «Hetyja ludzi majuć vopyt udziełu ŭ palityčnych kampanijach pa vybarach deputataŭ miascovych savietaŭ i pałaty pradstaŭnikoŭ», — skazaŭ Radźkoŭ.
Ministr paviedamiŭ, što členy inicyjatyŭnaj hrupy 30 vieraśnia paśla pracy arhanizujuć u Minsku prykładna 100 punktaŭ pa zbory podpisaŭ u padtrymku vyłučeńnia Łukašenki kandydatam na pasadu prezidenta.
«U nas chapaje aktyvu. Jon budzie pracavać karektna,
nie parušajučy zakanadaŭstva, u volny ad pracy čas. Sapiernictva na vybarach pavinna być hodnym i pryhožym», — zajaviŭ Radźkoŭ.
Jon paviedamiŭ, što členy inicyjatyŭnaj hrupy buduć vykarystoŭvać zbor podpisaŭ, kab vyvučyć prablemy nasielnictva, vysłuchać jaho nakazy Łukašenku.
U inicyjatyŭnuju hrupu hetaha pretendenta na pasadu prezidenta ŭvachodzić 8.403 čałavieki (druhi pakazčyk paśla hrupy Siarhieja Hajdukieviča).
Zbor podpisaŭ pačaŭsia 30 vieraśnia i zavieršycca 29 kastryčnika. Dla vyłučeńnia kandydata nieabchodna sabrać nie mienš za 100 tys. podpisaŭ hramadzian.
