Pieražyŭšy svaju partniorku pa filmie «U džazie tolki dziaŭčaty» Merylin Manro na 48 hadoŭ.
Pieražyŭšy svaju partniorku pa filmie «U džazie tolki dziaŭčaty», Merylin Manro, na 48 hadoŭ pamior viadomy halivudski aktor, Toni Kiorcis.
Aktor pakutavaŭ na prablemy ŭ lohkich i sercy i pamior u svaim łas-viehaskim domie.
Toni Kiorcis naradziŭsia ŭ siamji emihrantaŭ ź Vienhryi.
Z Kierkam Duhłasam u «Spartaku»:
Pačaŭ karjeru ŭ 1949 h. i pieršy pośpiech pryjšoŭ da Kiorcisa paśla stužak «Syn Ali-Baby» (1952) i «Hudyni» (1953). Paśla zaniapadu karjery ŭ 70-ch uvaha publiki była źviernutaja na pryvatnaje žyćcio Kiorcisa. Jon byŭ žanaty 6 razoŭ — siarod jahonych sužanic pryhažunia Džaniet Li. Jahonyja syny, Džejmi Li i Kieli taksama zrabilisia paśpiachovymi aktorami. Uvohule, Kiorcis mieŭ šeść dziaciej. Adzin ź ich, Nikałas, pamior ad pieradozu va ŭzroście 23 hadoŭ. Sam ža Toni taksama prynadziŭsia da narkotykaŭ — navat pravioŭ miesiac u 1984 h. u reabilitacyjnym centry. Toni viarnuŭ uvahu ŚMI knihaj miemuaraŭ «Amierykanski Prync» (2008), u jakoj daŭ čytačam zazirnuć za kulisy, dzie bavilisia jaho siabry: Džejms Dyn, Frenk Sinatra i viadoma, Merylin Manro.
— Jon byŭ bliskučym aktoram, mnie budzie jaho nie stavać, — kaža Rodžer Mur, jaki hraŭ z Kiorcisam u telesieryjale «Umaŭlalniki». — Jon byŭ uciešny, humarny, lohka impravizavaŭ.
Z Džekam Lemanam «U džazie tolki dziaŭčaty»:
Što da impravizacyi: Kiorcis zrabiŭsia aŭtaram nadzvyčaj udałaj žestu, jaki potym časta ekspłuatavali filmaroby.
U «Džazie», u viadomaj scenie na jachcie, kali Merylin Manro całuje Kiorcisa, u Toni pavoli padymajecca naha. Hetak było zapłanavana ŭ scenary? O, nie! Prosta scenu biespaśpiachova zdymali ceły dzień i ŭ aktora zaciakli nohi.
