Kruhły stoł pierakładčykaŭ biblijnych i liturhičnych tekstaŭ: cikava, ale biasplonna.
«Šmat tradycyj — adna mova». Pad takim devizam u Hreka-katalickim centry ŭ Miensku 23—24 kastryčnika adbyłasia sustreča śviataroŭ, fiłołahaŭ, historykaŭ, pierakładčykaŭ.
Hałoŭnaj zadačaj kruhłaha stała było sabrać razam ludziej, jakija zajmajucca pytańniami pierakładu biblijnych i liturhičnych tekstaŭ na biełaruskuju movu.
Prablema ŭ tym, što
pravasłaŭnyja pierakład liturhii vykonvajuć asobna (i niaśpiešliva), ryma-kataliki — asobna, pratestanty — sabie, a hreka-kataliki daŭno taki pierakład ździejśnili. Toje było podźviham ajca Alaksandra Nadsana,apostalskaha vizitatara dla biełarusaŭ-katalikoŭ zamiežža, u časie pryjezdu jakoha ŭ Biełaruś i była arhanizavanaja sustreča.
Pierakład Biblii na starabiełaruskuju movu pačaŭ Skaryna jašče ŭ XVI stahodździ. Ale na novabiełaruskuju movu ahulnapryniataha pierakładu pakul niama.
Pierakładali jaje Anton Łuckievič i pratestant Łukaš Dziekuć-Malej, paśla — Janka Stankievič (jahony pierakład zrobleny admysłovym, vysokim, archaičnym stylem), jašče paśla, častkami, — ajciec Uładzisłaŭ Čarniaŭski. Narešcie źjaviŭsia vielmi jasny dla sučasnaha čytača pierakład Vasila Siomuchi. Darečy, apošni razyšoŭsia vialikim dla Biełarusi 10-tysiačnym nakładam. Ale... I apošni pravasłaŭnaja i katalickaja ijerarchii nie pryznajuć, bo jaho rabiŭ nie carkoŭny dziejač, nie manach.
Da taho ž, datočvajecca mietadałahičny arhumient: i Stankievič, i Siomucha, i Łuckievič pry pierakładzie vykarystoŭvali aryhinalnyja movy ci padradkoŭniki i tłumačalniki ź ich (hreckaja, habrejskaja, aramiejskaja), ale nie byli daskanałymi znaŭcami abo zusim nie viedali.
Roznačytańni isnujuć va ŭsich pierakładach, roźniacca i liturhičnyja terminy.
Kataliki molacca Jezusu, hreka-kataliki — Isusu, pravasłaŭnyja — Iisusu. Kataliki śviatkujuć Naradžeńnie Chrystova, pravasłaŭnyja — Raždžastvo.I heta tolki samyja ahulnyja prykłady. Miž tym jość i šmat drabniejšych terminaŭ. Usio heta nie spryjaje nacyjanalnamu adzinstvu.
Udzielnica sustrečy, doktar bahasłoŭja Iryna Dubianieckaja adznačaje, što ŭ nas pabolšała kvalifikavanych śpiecyjalistaŭ. Na kruhłym stale sabrałasia bolš za 40 čałaviek: jak carkoŭnych, tak i śvieckich. Siarod ich byli prafiesary Alaksandr Łukašaniec dy Ivan Čarota, paet Juraś Paciupa, staršynia Biblijnaha tavarystva Hierman Rodaŭ. Havorka była cikavaj, časam zachaplalnaj. Ale...
Kiraŭnik Biblijnaj kamisii Biełaruskaj pravasłaŭnaj carkvy a. Siarhiej Hardun zajaviŭ: nas zadavalniaje toje, što jość. Amal toje samaje, tolki ŭ miakčejšych vyrazach, na nastupny dzień vykazaŭ ryma-katalicki biskup Antoni Dziamjanka.A heta aznačaje, što ni Pravasłaŭnaja, ni Katalickaja cerkvy nie prahnuć vypracoŭki adzinaha varyjanta terminałohii, ličačy svoj kanon adzina słušnym.
