Naŭzdahon Dali Hrybaŭskajcie piša Uładzimir Padhoł.
Pazaminuły tydzień na prezidenckich telekanałach prajšoŭ pad znakam vizitu prezidenta Litvy Dali Hrybaŭskajcie i padpisanaj damovy ab sproščanym pierachodzie miažy pamiž Litvoj i Biełaruśsiu.
Moc prapahandysckaj mašyny dyktatara była takoj mahutnaj, što niekatoryja žychary pavieryli ŭ sapraŭdnaść padpisanych pahadnieńniaŭ i papierli piecham praź miažu bieź nijakich dazvołaŭ.
Ale ž, kab pahadnieńnie pačało dziejničać, patrebnaja jaho ratyfikacyja zakanadaŭčymi orhanami i zatym padpisańnie prezidentami. A pry kancy ejfaryčnych repartažaŭ ab padpisańni histaryčnaha pahadnieńnia prezidenckija pahudčyki ścipła paviedamlali pra toje, što jano pačnie dziejničać, moža, letam 2011ha.
I ŭ cieni infarmacyjnaj bury zastałosia toje, što takoje ž pahadnieńnie padpisanaje z Polščaj u lutym 2010ha, z Łatvijaj — u žniŭni.
Polski sojm ratyfikavaŭ pahadnieńnie ab sproščanaj miažy, i prezident padpisaŭ jaho jašče da červienia 2010ha, a biełaruski bok ničoha nie robić.
A što lidary apazicyi, jakija vypinajucca na roli abaroncaŭ intaresaŭ naroda i chočuć stać kandydatami ŭ prezidenty? Pakul ad niekatorych — tolki asudžeńnie vizitu Dali, jaki byccam by skiravany na padtrymku Łukašenki na vybarach.
A zaraz krychu palityčnaj aryfmietyki.
Ustupleńnie ŭ moc pahadnieńniaŭ z palakami ablehčyć vizity ŭ Polšču, pa mierkavańni polskaha boku, prykładna 1,5 miljona hramadzian Biełarusi, ź litoŭcami — 600 tysiačam, z łatyšami — 500 tysiačam.
Heta značyć, što za 20 jeŭra bieź vizy žychary pamiežnaj zony da 50 km zmohuć až da piaci hadoŭ jeździć da rodzičaŭ u Polšču, Litvu, Łatviju na 50 km uhłyb, rabić zakupy dla siabie i na maleńki biznes.
Pamiežniki čakajuć cunami ludskich natoŭpaŭ na pierachodach.
Ale Łukašenka čakaje vynikaŭ vybaraŭ i jak by kaža Zachadu: «Kali pryznajecie vyniki maich vybaraŭ, jakija „projduć, jak u 2006 m hodzie“ tady my i ratyfikujem, a ja padpišu pahadnieńni ab sproščanym pierachodzie miažy. A kali
A čaho čakajuć kandydaty ŭ kandydaty ad padpisańnia pahadnieńniaŭ ab sproščanym pierasiačeńni miažy?
Vidać, čakali taho, što Dala Hrybaŭskajcie, majstar najvyšejšaha čornaha pojasa pa karate, schopić dyktatara za ruku, kinie praź ściahno, zrobić bolevy załom, tycnie piatkaj u skivicu i budzie bić dy łamać da toj pary, pakul dyktatar nie stanie demakratam z usimi vyciakajučymi adsiul vynikami.
Ujavicie sabie, što adrazu paśla 20 kastryčnika lidary apazicyi kinuli ŭsie pikiety ŭ pamiežnyja rajony źbirać podpisy za patrabavańnie da biełaruskaha parłamienta jak maha chutčejšaj ratyfikacyi padpisanych ministrami pahadnieńniaŭ i da Łukašenki, kab jašče da vybaraŭ jon padpisaŭ ich. A paralelna źbirać podpisy za svajo vyłučeńnie. Dumaju, što simpatyi 2,5 miljona vybarščykaŭ pamiežnych zonaŭ byli b na baku našych.
Čas jašče jość. I navat kali nie paśpiejuć padčas zboru podpisaŭ za vyłučeńnie, možna razharnuć tuju kampaniju padčas ahitacyjnaha pieryjadu.
Heta značna bolš efiektyŭna dla rejtynhu palityka i pośpiechu ŭ vybarach, čym padpisańnie damovaŭ z katami i inšaja myšynapalityčnaja vałtuźnia.
