4 listapada ŭ pamiaškańni Liceja BDU adbyŭsia schod upaŭnavažanych žycharoŭ Leninskaha rajona, na jakim vybirali delehataŭ na Ahulnanacyjanalny schod.U schodzie udzielničali žychary rajona, jakich, pavodle aficyjnaj viersii, papiarednie vyłučali na łakalnych schodach. Uziać udzieł u mierapryjemstvie pažadaŭ i adzin z patencyjnych kandydataŭ na pasadu prezidenta — Uładzimir Niaklajeŭ.
Delehataŭ padvozili hrupami.
Ideałahičnaja viertykal.
Schod u Licei BDU mieŭ raspačacca, a 15.30. Da bramy navučalnaj ustanovy adna za adnoj padjazdžali mašyny i mikraaŭtobusy, ź jakich vychodzili pieravažna žančyny za sorak u pampieznych strojach, dy ź jašče bolš pampieznymi fryzurami. Byli i mužčyny. U pryvatnaści, pierad žurnalistami čynna pradefilavaŭ dyrektar Nacyjanalnaha muzieja Uładzimir Prakapcoŭ.
Niaklajeŭ spaźniŭsia. Źjaviŭsia la hanku liceja na piać chvilin paźniej. Jaho tam užo čakała pradstaŭničaja delehacyja, jakaja składałasia z členaŭ arhkamiteta pa praviadzieńni schodu Leninskaha rajona Miensku dy dziasiatka mocnych mužčyn u adnolkavaj čornaj vopratcy. Delehacyju uznačalvaŭ spadar Pavieł Piskunoŭ. Jon ža i zajaviŭ Niaklajevu, što toj nie moža prysutničać na schodzie, bo nie vykanaŭ usich nieabchodnych pracedur.
«Miascovy źjezd, na jakim vas nibyta vybrali, byŭ praviedzieny nie adpaviedna z patrabavańniami. U nas jość źviestki, što u im pryniało udzieł nie 302 čałavieki, jak vy pišacie (nieabchodnaja kolkaść — 300 čałaviek), a 70–80.Tamu my nie možam vas ličyć pradstaŭnikom Leninskaha rajona», — zajaviŭ čynoŭnik. Svajho načalnika adrazu ž padtrymali inšyja členy arhkamitetu, pieravažna žančyny:
«Niapravilna vysunuty, vy niapravilna vysunuty». «My admovili nie tolki vam», — u adzin hołas śćviardžali žančyny.Niaklajeva heta nie spyniła i jon, zabyŭšysia na papiaredniaha surazmoŭcu, pieraklučyŭ svaju uvahu na žančyn: «Darahija maje pryhožyja žančyny! Čamu vy mianie nie chočacie papuścić?». Adkaz byŭ žaleznym: «My vas vielmi pavažajem, ale my členy arhkamiteta».
Sprečki praciahvalisia. Niaklajeŭ, razam z pradstaŭnikami svajho štabu, patrabavaŭ prapuścić jaho na schod, pradstaŭniki arhkamiteta admaŭlali, a mocnyja mužčyny ciełami zakryvali ŭvachod u budynak. Raznastajnaść u chod padziej unios deputat Hienadź Davydźka, jaki akurat nakiroŭvaŭsia na mierapryjemstva, praciskivajučysia praz natoŭp. «Hiena, Hiena, padydzi siudy!», — zahukaŭ Niaklajeŭ, pabačyŭšy dobraha znajomaha. Toj ihnaravać paeta nie staŭ i ŭviazaŭsia ŭ sprečku.
«Vałodzia, ja nie viedaju, jakaja tut struktura, jakaja pracedura», — zajaviŭ jon. «A jak ty sam trapiŭ na schod?» — zapytaŭ Niaklajeŭ. «Mnie zaprašeńnie dasłali, ja i pryjšoŭ. Tak było», — adkazaŭ deputat.Na pytańnie žurnalistaŭ, ci pravodziŭsia niejki schod pa jaho vyłučeńni, spadar Davydźka adkazać nie zmoh, što vyklikała vialiki šum siarod prychilnikaŭ Niaklajeva, pad jaki spadar deputat paśpiašaŭsia ŭciačy ź miesca padziej.
Atmaśfiera tym časam nakalałasia. Pradstaŭniki arhkamitetu advodziačy vočy tłumačyli Niaklajevu i žurnalistam, jakim čynam spadar Davydźka zmoh trapić na schod, kali nijakich mierapryjemstvaŭ pa vysoŭvańni jaho kandydatury nie pravodziłasia. U vyniku žančyny z arhkamitetu zajavili:
«Arhkamitet vyrašaje, kaho zaprašać, a kaho -- nie». Adnak krytery vybaru zaprošanych asob ŭsio ž nazvać nie zmahli.
Paspračaŭšysia jašče chvilin piać, Niaklajeŭ zdaŭsia pry ŭmovie, što pradstaŭniki arhkamitetu voźmuć u jaho tekst zajavy i ahučać jaje udzielnikam. Spadar Piskunoŭ nieachvotna pahadziŭsia zvarot uziać, adnak začytać jaho nie paabiacaŭ.
Na hetym i razyšlisia. Raźvitvajučysia z žurnalistami i siabrami svajho štabu, Niaklajeŭ zajaviŭ, što «siońnia my pabačyli, ja k nasamreč buduć adbyvacca prezidenckija vybary». Dastałasia ad paeta i zamiežnym haściam Łukašenki.
«Prezidenty pryjazdžajuć, ministry, abiacajuć try miljardy. A tut usio pa tym ža kole. Buduć falsifikacyi, potym ludzi vyjduć na płošču, zatym ich adtul razhoniać», — z sumam u hołasie havaryŭ Niaklajeŭ.Taksama jon vykazaŭ upeŭnienaść, što Zachad vybary pa takim scenary nie pryznaje, ale faktyčna praciahnie supracoŭnictva z Łukašenkam. Hetaj nie samaj aptymistyčnaj zajavaj skončyłasia sproba patencyjnaha kandydata trapić na Usiebiełaruski schod.