Bajcy specnazu zatrymali 12 udzielnikaŭ pratestu na Kastryčnickaj płoščy. Maładyja ludzi stajali na tym samym miescy, dzie asudžany siońnia na paŭtara hodu źniavoleńnia Źmicier Daškievič amal troje sutak vioŭ akcyju pratestu paśla prezydenckich vybaraŭ u sioletnim sakaviku. Moładź trymała partrety Źmitra Daškieviča, zapalenyja śviečki.
Bajcy specnazu, padyšoŭšy da moładzi, pacikavilisia, čamu pryśviečanaja hetaja akcyja, i vyklikali aŭtazak. Pry hetym junakam i dziaŭčatam specnazaŭcy skazali, što tyja mohuć stajać na płoščy kolki zachočuć. Ale, jak vyśvietliłasia, milicyjanty prosta nia mieli pobač mašyny.
Jak tolki pryjechaŭ aŭtazak, specnazaŭcy pačali chapać dziaŭčat i chłopcaŭ i kidać ich u mašynu. Była zatrymanaja i karespandentka Radyjo Svaboda Luboŭ Łuniova. Adjechaŭšy z Kastryčnickaj płoščy, aŭtazak spyniŭsia ŭ rajonie opernaha teatru, i specnazaŭcy vietliva paprasili žurnalistku vyjści z mašyny.
Usich astatnich zatrymanych, siarod jakich Kryścina Šacikava, Źmicier Fiedaruk, pavieźli ŭ milicyju Centralnaha rajonu Miensku.
❏
Maładafrontaŭcaŭ Źmitra Chviedaruka j Hleba Sandrasa abvinavacili ŭ drobnym chulihanstvie
Jak paviedamiŭ tolki što adzin z zatrymanych aktyvistaŭ Maładoha Frontu, usich udzielnikaŭ siońniašniaje akcyi na Kastryčnickaj płoščy vyzvalili paśla taho, jak u ich pierapisali pašpartnyja dadzienyja.
Adnak na dvuch maładafrontaŭcaŭ, na Źmitra Chviedaruka j Hleba Sandrasa skłali pratakoły pa art.156 (drobnaje chulihanstva) i ich źmieścili ŭ kameru Centralnaha RUUS, dzie jany buduć znachodzicca da zaŭtrašniaje ranicy, da sudovaha pracesu, što adbudziecca Centralnym sudzie h.Miensku pa vulicy Kirava, 21.
