Pahadnieńnie ab vydzialeńni Respublicy Biełaruś pazyki Suśvietnaha banka ŭ pamiery 150 młn. dalaraŭ ZŠA na prajekt «Udaskanaleńnie i madernizacyja aŭtamabilnaj darohi» padpisana 19 listapada ŭ Minsku. Pahadnieńnie ab pazycy padpisali ministr transpartu i kamunikacyj Ivan Ščerba i kiraŭnik pradstaŭnictva Suśvietnaha banka ŭ Biełarusi Ivan Vieleŭ.
Rašeńnie ab vydzialeńni pazyki było pryniata savietam vykanaŭčych dyrektaraŭ Suśvietnaha banka 11 listapada 2010 hoda. Metaj hetaha prajekta źjaŭlajecca sadziejańnie ŭ raźvićci transpartnaj infrastruktury stratehičnaha tranzitnaha kalidora i ŭviadzieńnie elektronnaj sistemy apłaty darožnych zboraŭ. Na pieršym etapie prajekta, na jaki vydzialajecca 131 młn. dalaraŭ, buduć praviedzienyja mierapryjemstvy pa pieraabstalavańni ŭčastkaŭ darohi ź dźviuma pałosami ruchu pamiž Minskam i Babrujskam ahulnaj praciahłaściu 53 km. Budzie stvorana aŭtamahistral z čatyrma pałosami ruchu, pabudavana šeść dvuchuzroŭnievych raźviazak, siem puciepravodaŭ, čatyry novyja masty, dva piešachodnyja padziemnyja pierachody i inšyja abjekty darožnaj infrastruktury. Učastak darohi, jaki rekanstrujujecca, źjaŭlajecca častkaj transjeŭrapiejskaha transpartnaha kalidora IX, jaki spałučaje Čornaje mora z krainami Bałtyi.
Druhi kampanient, na jaki praduhledžana 18 miljonaŭ dołaraŭ ZŠA, budzie nakiravany na pačatkovy etap raboty pa ŭviadzieńni novaj sistemy apłaty darožnych zboraŭ u Biełarusi na asnovie pieradavych technałohij, što «dazvolić pavysić efiektyŭnaść ekspłuatacyi darožnaj sietki i pryvieści jaje ŭ adpaviednaść sa standartami ES».
Treci kampanient, aryjencirovačny košt jakoha składaje 1 miljon dalaraŭ ZŠA, budzie nakiravany na ŭzmacnieńnie instytucyjanalnaha patencyjału ŭstanoŭ darožnaha siektara Biełarusi i akazańnie im sadziejańnia ŭ rabocie pa pierachodzie da jeŭrapiejskich standartaŭ i mietadaŭ.
Jak adznačyŭ Ivan Vieleŭ, heta pieršy darožny prajekt Suśvietnaha banka ŭ Biełarusi. «Heta taksama samy vialiki inviestycyjny prajekt Suśvietnaha banka ŭ Biełarusi z 1992 hoda», — padkreśliŭ Vieleŭ.
Pavodle jaho słoŭ, prajekt stanoŭča adabjecca na źniešnim bałansie i tavaraabarocie Biełarusi, jaje tranzitnaj pryvabnaści, stvoryć novyja pracoŭnyja miescy, budzie spryjać pavieličeńniu transpartnych patokaŭ.
Ivan Ščerba adznačyŭ, što ŭ ramkach prajekta budzie rekanstrujavany nie vielmi vialiki ŭčastak darohi — 53 km, jaki nieabchodna davieści da stanu pieršaj katehoryi jeŭrapiejskich standartaŭ. «Hetaja daroha budzie adpaviadać samym sučasnym standartam. Z 1 sakavika 2011 hoda našy padradčyki buduć pracavać pa ŭsim froncie trasy», — skazaŭ ministr transpartu i kamunikacyj.
Pazyka vydzialajecca Suśvietnym bankam na 15 hadoŭ z adterminoŭkaj vypłat asnoŭnaj sumy doŭhu na praciahu piaci hadoŭ. Realizacyja prajekta pačniecca ŭ sakaviku 2011 hoda i zojmie čatyry hady.
Biełaruś stała členam Suśvietnaha banka ŭ 1992 hodzie. Za hety čas krainie było vydzielena 865 miljonaŭ dalaraŭ ZŠA na realizacyju dvanaccaci prajektaŭ.
