Ekśpierty staličnaha rynku arendy žyllovaj nieruchomaści prahnazavali, što ŭkastryčniku-listapadzie , paśla taho, jak zakončycca studencki ažyjataž, adbudziecca patańnieńnie arendy minskich kvater. Adnak sioleta hetaha patańnieńnia praktyčna nie było…
Minimalny košt adnapakajovak — 200 USD
Siońnia samyja słabieńkija pa jakaści adnapakajovyja kvatery ŭ starych damach u Zavodskim rajonie i Šabanach, a taksama kvatery biez mebli ŭ Frunzienskim rajonie prapanujucca klijentam pa košcie 200–220 dołaraŭ. Hod tamu žyllo takoj jakaści było na 30–40 dołaraŭ tańniej. «Słabieńkija» dvuchpakajovyja kvatery (ci takoje žyllo biez mebli) kaštuje 250 dołaraŭ.
Pavodle infarmacyi ahienta pa apieracyjach z žyllovaj nieruchomaściu ahienctva nieruchomaści «Dzinas» Iny Kulšy, minimalny košt arendy adnapakajovych kvater uzdoŭž linii mietro składaje 250 dołaraŭ. Adnak pa takim košcie zaraz mahčyma adšukać maleńkija kvatery tolki sa standartnym naboram ajčynnaj mebli, chaładzilnikam i televizaram. Kvatera z sučasnaj kuchniaj i pralnaj mašynaj budzie kaštavać užo daražej.
Zvyčajnyja dvuchpakajovyja kvatery niedaloka ad mietro kaštujuć 300–350 dołaraŭ.
Na rynku nie chapaje jakasnaha žylla pa razumnych cenach
Zhodna ź infarmacyjaj Iny Kulšy, siońnia samymi masavymi klijentami ahienctvaŭ nieruchomaści źjaŭlajucca maładyja ludzi (hałoŭnym čynam — minčanie), jakija vyrašyli zdymać žyllo, kab žyć asobna ad baćkoŭ. Takija maładyja siemji majuć siarednija zarobki kala 600–700 dołaraŭ i hatovyja zdymać adna- ci dvuchpakajovyja kvatery za 300–350 dołaraŭ. Za taki košt klijenty žadajuć mieć jakasnaje žyllo z meblaj i sučasnaj bytavoj technikaj, dzie abaviazkova pavinna być niestaraja kuchnia i pralnaja mašyna. Adnak na rynku takich chadavych kvater ź siarednim ceńnikam arendy siońnia nie chapaje. Popyt na jakasnaje i nie vielmi darahoje žyllo ciapier bolšy za prapanovu.
Ciapier maładyja siemji z ułasnym aŭto aktyŭniej pačynajuć zdymać bolš prastornaje žyllo ŭ novabudoŭlach. Tam novyja kvatery majuć sučasnuju płaniroŭku i ŭtulnyja kuchni, a pobač z domam chapaje miescaŭ dla parkoŭki. Hetym letam u Frunzienskim rajonie ŭ ekspłuatacyju było zdadziena šmat novych damoŭ. Ceny na arendu tam da siaredziny kastryčnika byli nievialikija, adnak potym… Pustyja kvatery ŭ novabudoŭlach byli chutka «pavymyvanyja», i ceny znoŭ paleźli ŭhoru.
Maskoŭskija hulcy časam hatovyja zdymać minskija kvatery i za 500–700 dołaraŭ
Apošnim časam biełaruskuju stalicu ŭsio čaściej naviedvajuć maskoŭskija «hrašovyja turysty», jakija žadajuć dobra «adpačyć» u darahich kamfortnych kazino. Vialikaja kolkaść takich azartnych turystaŭ źjaŭlajecca ŭ Minsku na vychadnyja i na rasijskija śviaty. Naprykład, u listapadzie maskoŭskija hulcy «zavisali» ŭ minskich kazino na praciahu amal dvuch tydniaŭ. Raniej maskoŭskija amatary ruletki čaściej zdymali kvatery na sutki, adnak dla hramadzian susiedniaj stalicy košt takoj pasłuhi dasiahnuŭ 60–100 dołaraŭ. Maskoŭskija hulcy chutka skiemili, što im lepš aformić doŭhaterminovuju arendu, niachaj i darahich kvater u centry za 400–500, a časam i za 700 dołaraŭ za miesiac. Praŭda, našy haspadary darahich kvater taksama ŭrazumieli, što na «hulniavoj chvarobie» možna zarablać dobryja hrošy. Siońnia ŭładalniki jakasnych kvater u Centralnym i Savieckim rajonach patrabujuć ad klijentaŭ z maskoŭskaj prapiskaj pieradapłatu pa arendzie adrazu za 2–3 miesiacy.
