Sprava ab vybuchu na 3 Lipienia: padmanny śled 2

Bolš za hod pravaachoŭnyja orhany praviarali na dačynieńnie da vybuchu ŭ Minsku unačy na 4 lipienia 2008-ha 23-hadovaha žychara Maładziečna. Nahadajem: u vyniku taho, što spracavała samarobnaja vybuchnaja pryłada, padčas kancerta ŭ honar Dnia niezaležnaści paciarpieli 54 čałavieki.

Načyńnie bomby, što vybuchnuła ŭ noč na 4 lipienia 2008 u Minsku

Fotarobat padazravanaha ŭ spravie pa vybuchu

Jak stała viadoma internet-haziecie Naviny.by, dniami padazreńni ŭ arhanizacyi vybuchu z maładoha čałavieka źniatyja, adnak naohuł paźbiehnuć kryminalnaj adkaznaści jamu nie ŭdałosia. U dačynieńni da jaho śledčym adździełam papiaredniaha rasśledavańnia Maładziečanskaha RAUS raspačataja sprava pa artykule 295 Kryminalnaha kodeksa («Niezakonnyja dziejańni ŭ dačynieńni da ahniastrelnaj zbroi, bojeprypasaŭ i vybuchovych rečyvaŭ»).

Hetaja kryminalnaja historyja pačałasia jašče 10 červienia 2009.

Z Maładziečanskaj centralnaj rajbalnicy ŭ milicyju pastupiła paviedamleńnie ab tym, što ŭ hetuju ŭstanovu sa svajoj kvatery dastaŭleny rabočy adnaho ź miascovych pradpryjemstvaŭ. Małady čałaviek byŭ špitalizavany z traŭmami pravaj kiści i amputacyjaj troch palcaŭ.

Papiarednie było vyśvietlena, što ŭ rukach chłopca vybuchnuŭ… zvyčajny adnarazovy špryc, u jakim znachodziłasia niejkaje rečyva. Sam ža paciarpieły kazaŭ pra svaju niaŭdałuju sprobu vyrabić fiejervierk z dapamohaj šerahu rečyvaŭ i špryca ŭ jakaści kantejniera. Paśla taho, jak damarosły piratechnik nazvaŭ hetyja rečyvy, im ščylna zanialisia supracoŭniki Upraŭleńnia kryminalnaha vyšuku MUS. Małady čałaviek paviedamiŭ, što «fiejervierk» jon rabiŭ z elektralitaŭ, acetonu i hidrapierytu. Apošnija dva kampanienty ŭvachodzili ŭ skład vybuchnoj pryłady, jakaja i spracavała ŭ noč na 4 lipienia 2008 u Minsku.

U rasparadžeńni Naviny.by znachodzicca pamiatka dla supracoŭnikaŭ MUS, jakija ŭdzielničali ŭ mierapryjemstvach pa pošuku padryŭnika. Ź jaje vynikaje, što dla vyrabu bomby, što vybuchnuła padčas śviatočnaha kancertu, vykarystoŭvalisia: hajki, čarciožnaja papiera, forma pad zalivańnie, falha charčovaja, pierakis vadarodu, aceton, tabletki hidrapierytu. U liku asobaŭ, na jakich nieabchodna źviartać asablivuju ŭvahu, nazyvalisia hramadzianie, «jakija cikaviacca, vyrablajuć, zachoŭvajuć vybuchovyja rečyvy, piratechničnyja sumiesi, samarobnyja vybuchnyja pryłady — vybuchnyja pakiety, pietardy i h.d.».

U kvatery maładziečanca praviali pieratrus, ale, akramia śladoŭ nievialikaha vybuchu, ničoha nie znajšli. Adnak apieratyŭnikam udałosia razhavaryć maci paciarpiełaha. Žančyna pryznałasia, što paśla taho, jak syna pavieźli ŭ špital, jana sabrała ŭ pakiet usie jaho «fiejervierki» i vykinuła ich u najbližejšy śmiećcievy kantejnier.

Rečavyja dokazy duraści jaje syna sa śmietnicy z asablivaj aściarožnaściu dastali śpiecyjalisty hrupy raźminiravańnia. U pakiecie znachodzilisia čatyry adnarazovych šprycy z zapłaŭlenymi miescami macavańnia ihołak, u jakich znachodziłasia rečyva biełaha koleru i papiarovyja kłaki.

Pavodle zaklučeńnia ekśpiertaŭ, usie daśledavanyja pradmiety źjaŭlajucca samarobnymi vybuchovymi pryładami i prydatnyja dla vytvorčaści vybuchoŭki.

Kryminalisty vyśvietlili i toje, pra što zmaŭčaŭ paciarpieły piratechnik: vybuchovaje rečyva było vyrablena na asnovie tryacetontrypieraksidu. Zapraŭlenyja takim adčuvalnym načyńniem šprycy mahli vykarystoŭvacca jak samastojnyja bomby, tak i ŭ jakaści detanataraŭ dla asnoŭnaha zaradu, jaki składajecca, naprykład, z hieksahienu, jaki ŭ svaich metach nie raz vykarystoŭvali terarysty pa ŭsim śviecie.

Pa źviestkach Naviny.by, zaklučeńnie ekśpiertyzy Hałoŭnaha ekśpiertna-kryminalistyčnaha centra MUS pastupiła ŭ Maładziečanskaje RAUS 16 listapada. Na padstavie hetych materyjałaŭ i była raspačataja kryminalnaja sprava pa fakcie «niezakonnych dziejańniaŭ u dačynieńni da vybuchovych rečyvaŭ».

Čym vyklikanaja takaja «raźbiežka» ŭ časie (ad vybuchu ŭ kvatery žychara Maładziečna da jaho pryciahnieńnia da kryminalnaj adkaznaści prajšło amal paŭtara hoda), vyśvietlić pakul nie ŭdałosia.

Usio jašče ničoha novaha i pra chod śledstva pa rezanansnaj spravie ab vybuchu 4 lipienia 2008. U pravaachoŭnych orhanach tradycyjna adkazvajuć: «Śledstva praciahvajecca…»

Daviedka. Vybuch samarobnaj biezabałonkavaj pryłady adbyŭsia ŭ 00.26 4 lipienia 2008 padčas kancertu kala steły «Minsk — horad-hieroj», što prachodziŭ z nahody aficyjnaha Dnia niezaležnaści. Bomba była źmieščanaja ŭ dvuchlitrovy pačak z-pad apielsinavaha soku «Sadočak» z nadpisam ad ruki «5700». Unutry, jak vyśvietlili ekśpierty, znachodzilisia: kitajski budzilnik, pravady, batarejki, 700-hramovaja sumieś vybuchovaha rečyva i hajki jak paškodžvalny elemient. U vyniku vybuchu pa dapamohu da miedykaŭ źviarnulisia 54 čałavieki, ź ich 47 byli špitalizavanyja. Paźniej paciarpiełym była akazana materyjalnaja dapamoha na sumu 81,2 miljona rubloŭ.

Pa fakcie vybuchu była raspačataja kryminalnaja sprava pa častcy 3 artykuła 339 (złosnaje chulihanstva) Kryminalnaha kodeksa Respubliki Biełaruś. Rasśledavańnie ŭziaŭ pad asabisty kantrol prezident Alaksandr Łukašenka, jaki, darečy, u momant vybuchu znachodziŭsia na tym śviatočnym kancercie. Svaimi pasadami papłacilisia dziaržsakratar Savieta biaśpieki Viktar Šejman i kiraŭnik Administracyi prezidenta Hienadź Niavyhłas. A voś Uładzimir Navumaŭ tady ŭsiedzieŭ ŭ kreśle ministra ŭnutranych spravaŭ. I navat praz paŭhoda byŭ poŭny rašučaści raskryć złačynstva.

«Da taho času, pakul vybuch, jaki adbyŭsia 4 lipienia, nie budzie raskryty, ja nie lahu spać i nie sydu ŭ adpačynak z čystym sumleńniem», — abiacaŭ jon 30 śniežnia 2008 ministr unutranych spravaŭ Uładzimir Navumaŭ. Ciapier jon užo nie ministr, i navukoŭcy ź miedykami navat nie dapuskajuć, kab čałaviek moh tak doŭha abychodzicca biez snu.

U mierapryjemstvach pa pošuku «złosnaha chulihana» pieršapačatkova byŭ zadziejničany praktyčna ŭvieś asabovy skład MUS. Tolki za pieršy hod rasśledavańnia byli apytanyja dziasiatki tysiač minčukoŭ, a adbitki palcaŭ ŭziali ŭ bolš čym 1,3 miljona žycharoŭ Biełarusi. Byŭ składzieny psichałahična-sacyjałahičny partret mierkavanaha złačynca, pad jaki padyšło zvyš tysiačy čałaviek, usich ich «adpracavali». Na roznyja terminy byli zatrymanyja dzieviać supracoŭnikaŭ kampanii «Vładprodimport», jakaja zajmałasia pastaŭkaj u Biełaruś sokaŭ, u tym liku marki «Sadočak». Praviedziena bolš za 500 daśledavańniaŭ roznaha charaktaru. MUS źviartałasia pa dapamohu ŭ rasśledavańni hetaha złačynstva da śpiecyjalistaŭ dziasiatku krain i Interpoła. U datyčnaści da vybuchu padazravali bolš za dva dziasiatki čałaviek, ale nikomu abvinavačańnie tak i nie pradjaŭlenaje.

Biełaruski naviny

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH