Dziakujučy vykarystańniu słancavaha hazu ZŠA zajmieli taki lišak tannaj syraviny, što rychtujucca da ekspartnaj ekspansii ŭ śviecie.
Kiraŭnik amierykanskaha hazaporta Freeport LNG razam z aŭstralijskim fondam Macquarie maje namier da 2015 hoda vydatkavać $2 młrd na ekspart hazu z Freeport'a, u pieršuju čarhu ŭ Aziju. Terminał Freeport LNG byŭ pabudavany niekalki hadoŭ tamu, kali amierykanskija ekanamisty pradkazvali, što ŭłasnyja zapasy hazu buduć vyčarpanyja, i Złučanym Štatam daviadziecca impartavać jaho ŭsio bolš.
Hetyja pradkazańni byli abvierhnutyja kala čatyroch hadoŭ tamu, kali byli raspracavanyja navatarskija mietady zdabyvańnia hazu sa słancavych skałaŭ.
Dziakujučy hetamu vytvorčaść hazu ŭ ZŠA chutka raście, i ŭžo ŭ minułym hodzie ZŠA ŭpieršyniu za apošnija dziesiać hadoŭ zabrali ŭ rasijcaŭ zvańnie najbujniejšaha vytvorcy hazu ŭ śviecie.
— U nas jość ułasnyja resursy hazu, dastatkovyja dla zadavalnieńnia patrebaŭ ZŠA na nastupnyja sto hadoŭ, — padkreśliŭ kiraŭnik Freeport LNG Majkł Śmit, jakoha cytuje Reuters. U Złučanych Štatach vyrablajecca ŭsio bolš i bolš słancavaha hazu, i košty na syravinu ŭ hetym hodzie ŭ ZŠA ŭpali ŭžo na čverć.
Za 1 tys. kubičnych mietraŭ hazu ŭ ZŠA ciapier płaciać kala 140 dalaraŭ — amal u try razy mienš, čym Polšča płacić «Hazpramu».I ŭ toj ža čas usio bolš i bolš kampanij chočuć vykarystać słancavy bum.
Ekspart — najlepšy sposab rehulavać liški tannaha hazu sa słancaŭ i vykarystoŭvać amierykanskija hazaporty, jakija prastojvajuć za niepatrebnaściu — z hetym pahadžajecca ŭsio bolš ekśpiertaŭ pa toj bok Atłantyki. U ZŠA, prynamsi ŭ siarednieterminovaj pierśpiektyvie, budzie lišak hazu, jaki moža być ekspartavany, — paviedamiŭ Robin Bejkier, kiraŭnik enierhietyčnaha adździeła francuzskaha banka Société Générale.
Vializnyja zapasy słancavaha hazu adkrytyja taksama ŭ Niamieččynie, Polščy, Ukrainie. Kali radoviščy ŭdasca raspracavać, Jeŭropa zmoža radykalna źbić ceny na rasijski haz.
Hieołahi miarkujuć, što haryzonty, bahatyja na słancavy haz, mohuć ciahnucca i ŭ Biełaruś.
