Sidorski i Pucin pa telefonie abmierkavali padrychtoŭku pahadnieńniaŭ pa stvareńni AEP 2

3 śniežnia prem'jer-ministry Biełarusi i Rasii Siarhiej Sidorski i Uładzimir Pucin u telefonnaj razmovie abmierkavali chod padrychtoŭki pahadnieńniaŭ pa stvareńniu AEP (Adzinaj ekanamčnaj prastory). Ab hetym paviedamiŭ pres-sakratar prem'jer-ministra Biełarusi Alaksandr Cimašenka.

«Kiraŭniki ŭradaŭ Biełarusi i Rasii siońnia ŭ telefonnaj razmovie abmierkavali chod padrychtoŭki pahadnieńniaŭ u ramkach stvareńnia AEP u adpaviednaści z damoŭlenaściami, dasiahnutymi premjerami ŭ chodzie sustrečy adzin na adzin 19 listapada ŭ Sankt-Pieciarburhu», — skazaŭ Alaksandr Cimašenka.

Ciapier praca z hetymi dakumientami idzie na ŭzroŭni namieśnikaŭ prem'jer-ministraŭ i ekśpiertaŭ. Sidorski i Pucin u hutarcy kanstatavali vysokuju stupień hatoŭnaści dakumientaŭ da padpisańnia.

Prem'jer-ministry Biełarusi i Rasii damovilisia, što astatnija pytańni pa dakumientach, u vypadku nieabchodnaści, jany ŭzhodniać pry asabistaj sustrečy ci ŭ telefonnaj razmovie da sustrečy kiraŭnikoŭ dziaržaŭ, jakaja pavinna adbycca ŭ śniežni 2010 hoda, paviedamlaje BIEŁTA.

Padčas razmovy Sidorski pavinšavaŭ Pucina ź pieramohaj Rasii «ŭ niaprostym spabornictvie za prava praviadzieńnia čempijanatu śvietu pa futbole ŭ 2018 hodzie». Jon adznačyŭ, što Biełaruś była ŭpeŭniena ŭ pieramozie Rasii, i pažadaŭ joj nie tolki pravieści hety čempijanat na vysokim uzroŭni, ale i zavajavać futbolny Kubak śvietu ŭ siabie doma.

Pucin u svaju čarhu vykazaŭ upeŭnienaść, što Biełaruś taksama na vysokim uzroŭni praviadzie Čempijanat śvietu pa chakiei ŭ 2014 hodzie.

AEP nazyvajuć palityčnym prajektam Pucina, jaki maje na mecie, z dapamohaj ekanamičnych faktaraŭ, zamacavać Biełaruś u rasijskaj śfiery ŭpłyvu.

0

0

0

0

0

0

SM

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH