U 2011 hodzie ŭ Biełarusi płanujecca aktyvizavać raspracoŭku miechanizmu pakryćcia i pracesu kampiensacyi pa ŭkładach Aščadnaha banka SSSR, uniesienych da pačatku1990-ch hadoŭ.
Pra heta paviedamiŭ staršynia praŭleńnia Nacyjanalnaha banka Biełarusi Piotr Prakapovič padčas pramoj linii, jakuju arhanizavała hazieta «Respublika».
«Hetaje pytańnie ŭ krainie nie zakrytaje», — skazaŭ kiraŭnik Nacbanka. Układy, pavodle jaho słoŭ, płanujecca viarnuć poŭnaściu z ulikam inflacyi i ŭsich pracentaŭ za minułyja hady. «Nie chvalujciesia, ničoha nie źniknie: u krainie viadziecca poŭny ŭlik usich układaŭ Aščadnaha banka. My ŭsio adsočvajem», — zapeŭniŭ Prakapovič.
Jon taksama patłumačyŭ, čamu heta nie ŭdałosia zrabić u minułyja hady.
«Dahetul nijak nie možam vyrašyć hetaje pytańnie. Vy ž razumiejecie, što ŭkłady treba kampiensavać za košt biudžetu, ale ŭ nas situacyja była składanaja. U pieršyja hady isnavańnia Biełarusi jak samastojnaj dziaržavy my stracili prykładna 40% VUP, u krainie było masavaje biespracoŭje, i nam spatrebiłasia 8 hadoŭ dla taho, kab adnavić ekanomiku. Tolki ŭdałosia ŭstać na nohi, jak adbyŭsia druhi kryzis — rasijski.
Pavodle jaho słoŭ, spatrebiłasia prykładna piać hadoŭ, kab adnavić straty. «U hetaj piacihodcy pačali pracavać narmalna, — praciahnuŭ Prakapovič, — i raptam adbyŭsia novy kryzis, pryčym nie ŭ nas, nie ŭ Rasii, a ŭ ZŠA i ŭ samych bahatych jeŭrapiejskich krainach. My padyšli da pytańnia kampiensavańnia „savieckich“ układaŭ ščylna, ale mižnarodny kryzis znoŭ pierakreśliŭ hetyja płany. U nastupnym hodzie pačniem aktyŭna pracavać i znoŭ budziem unosić prapanovy ab tym, kab pačać viartać „savieckija“ ŭkłady nasielnictvu».
Kiraŭnik Nacbanka padkreśliŭ, što ŭ hetym pytańni ŭsio abumoŭlivajecca stanam ekanomiki.
