Hałoŭnym vynikam kanferencyi rehijanalnych kaalicyjaŭ abjadnanych demakratyčnych siłaŭ Biełarusi ŭ Kijevie stałasia navina pra sklikańnie paŭtornaha Kanhresu demakratyčnych siłaŭ, jaki projdzie nie paźniej za 25 sakavika nastupnaha hodu. 60% delehataŭ kanferencyi prahałasavała za praviadzieńnie novaha Kanhresu.
Jaho delehatami buduć kandydaty ŭ deputaty miascovych savietaŭ, jakija źbiaruć nia mieniej za 300 podpisaŭ vybarcaŭ.
Lider abjadnanych demakratyčnych siłaŭ Alaksandar Milinkievič skieptyčny nakont perspektyvaŭ kanhresu. Na jahonuju dumku, heta budzie navat nie Kanhres demakratyčnych siłaŭ, a Kanhres palityčnych siłaŭ, bo na im buduć reprezentavanyja tolki tyja aktyvisty, jakija iduć na vybary. Milinkievič škaduje, što ŭ pracy kanhresu nia zmohuć uziać udziełu žurnalisty, biznesoŭcy i inšyja katehoryi hramadzianaŭ, jakija nie źbirajucca balatavacca. «U ciapierašnich umovach zvyčajny dyrektar škoły ci doktar palikliniki nia moža sabie dazvolić udzielničać u vybarach, tym samym my zvužajem pradstaŭnictva Kanhresu da palityčnych aktyvistaŭ».
Milinkievič vystupaje za toje, kab u kaalicyi zastaŭsia adziny lider z pašyranymi paŭnamoctvami. Na jahonuju dumku, biez adzinaha lidera apazycyja nia budzie dziejazdolnaj. Sa słovaŭ Milinkieviča, jon hatovy sastupić miesca lidera, jano dla jaho nie samameta, ale lidera mieć musova.
Staršynia AHP Anatol Labiedźka ž, u svaju čarhu, ličyć, što demakratyčnaj kaalicyi lider nie patrebny. Na dumku Labiedźki, dosyć adzinstva na platformie ruchu «Za Svabodu».
