Polskija deputaty, jakija pracujuć nad «Narodnaj prahramaj padtrymki siamji», chočuć zakanadaŭča abmiežavać vykarystańnie zaścierahalnych srodkaŭ.
«Polskaja siamja pad pahrozaj, naradžalnaść małaja. A prezervatyŭ adna z tych pahrozaŭ», – kaža Anna Sabiecka. «Zaścierahalnyja srodki razładžvajuć arhanizm žančyny i pryvodziać da biaspłodnaści», – bje tryvohu Marjan Piłka, jaki daŭno viadomy jak zmahar suprać zaścierahalnych srodkaŭ. Pavodle jaho, u Polščy kala miljona žančyn majuć prablemy ź zaciažarvańniem.
Deputaty chočuć, kab na kožnaj upakoŭcy prezervatyvaŭ i kantracepcyjnych tabletak źjavilisia zaściarohi padobnyja da tych, što źmiaščajucca na pačkach cyharet. Pavodle druhoj zadumy, na biudžetnyja hrošy maje być arhanizavanaja kampanija pra pahrozy, źviazanyja z užyvańniem zaścierahalnych srodkaŭ. Ministerstva zdaroŭja nie vyklučaje, što sapraŭdy dałučycca da akcyi. «Heta nie zusim praŭda, što zaścierahalnyja srodki nia škodnyja», – zajaviŭ vice-ministar zdaroŭja Jarasłaŭ Pinkas.
U zmahańni z zaścierahalnymi srodkami deputat Piłka abapirajecca na daśledavańni, jakija nibyta śviedčać pra toje, što miž inšaha prezervatyvy pavialičvajuć ryzyku biaspłodnaści ŭ žančyn. Adnak navukoŭcy i daktary paciskajuć plačyma j śćviardžajuć, što takich daśledavańniaŭ nikoli nie było i niama. «Niŭ vodnaj hruntoŭnaj medyčnaj publikacyi nie było takich tezaŭ», – kaža doktarka Anna Mažec-Bahusłaŭska z nacyjanalnaha centru baraćby sa ŚNIDam.
Urad Polščy razhledzić «Narodnuju prahramu padtrymki siamji» ŭ nastupnym hodzie. Tady j budzie pryniataje rašeńnie, ci budzie prahrama ažyćciaŭlacca i na jakich umovach, – paviedamlaje hazeta «Metro».
