U nieaficyjnym śpisie pretendentaŭ na Nobieleŭskuju premiju pa litaratury Ryhor Baradulin zaniaŭ šostaje miesca, tym samym abyjšoŭšy vialikuju kolkaść viadomych u śviecie pretendentaŭ.
Vyłučeńnie Baradulina padtrymała rada Sajuza biełaruskich piśmieńnikaŭ, Biełaruski i Rasiejski PEN-centry i šerah inšych arhanizacyjaŭ. Tvorčaść paeta była pradstaŭlena knihaj duchoŭnaj paezii «Ksty», jakuju pierakłała českaja paetka Franciška Sokałava.
Miž inšym cikava, što biełaruskaja litaratura ŭ śpisie pretendentaŭ na ŭznaharodu była pradstaŭlena jašče Śviatłanaj Aleksijevič, jakaja vyłučanaja Šviedzkim PEN-centram. A niekalki hod tamu ŭ pretendenckim šerahu nazyvaŭsia i Vasil Bykaŭ. Treba adznačyć, što, u pryncypie, imiony pretendentaŭ na Nobiela trymajucca ŭ sakrecie, u tym liku i paśla abviaščeńnia laŭreata. Pra šostaje miesca Baradulina paviedamiŭ kiraŭnik TBM Aleh Trusaŭ.
Sam paet i nia maryć ab atrymańni premii, i ŭ hetaj, zdavałasia b, asabistaj spravie dumaje pra Biełaruś i turbujecca pra ŭźniaćcio biełaruskaha pytańnia ŭ śviecie:
«Ja byŭ vielmi spakojny da hetaha, i nie tamu, što fihurujusia, jak havaryŭ Karatkievič, ale tamu, što viedaju, što premii hetaje mnie nia budzie. A zhadziŭsia ja ŭ hetym kole krucicca, kab śviet pačuŭ pra Biełaruś, što voś i biełarusy na niešta pretendujuć, što naša mova pretenduje. Mnie bolš za ŭsio spadabałasia ŭ hetaj historyi, jak unučka Daminička skazała, što kali dzieda atrymaje premiju, my tady ramont u kvatery zrobim», - kaža paet u intervju Radyje «Svaboda».
Z našych susiedziaŭ Nobieleŭskaj litaraturnaj premii nie majuć, jak i my, litoŭcy, łatyšy dy ŭkraincy. A voś polskim i rasiejskim piśmieńnikam jaje davali ažno niekalki razoŭ. A čaściej za ŭsich litaraturnaha Nobiela brali francuzy – 12 razoŭ, amerykancy – 10, anhielcy – 8, niemcy – 7.
Nobieleŭskaja premija – štohadovaja ŭznaharoda, nazvanaja ŭ honar jaje zasnavalnika, šviedzkaha vynachodnika i pramysłoŭca Alfreda Nobiela (1833-1896). Premija prysudžajecca za pracy ŭ vobłaści fizyki, chimi, fizyalohii abo medycyny, litaratury, ekanomiki, a taksama za dziejnaść pa ŭmacavańni miru. Hałoŭnymi kryterami pry abrańni kandydataŭ na ŭznaharodu źjaŭlajucca najnoŭšyja dasiahnieńni albo raniejšyja pracy, u tym vypadku, kali ich značnaść stała vidavočnaja paźniej. Usio pretendenty, za vyklučeńniem pajšoŭšych z žyćcia, zastajucca siarod kandydataŭ na atrymańnie premii, navat kali ich imia nia było nazvanaje siarod laŭreataŭ pa vynikach minułaha hodu. Usiaho za ŭvieś čas isnavańnia premii z 1901 hoda jaje atrymali 102 čałavieki.
