«Pa dadzienych instytuta, za A. Łukašenku prahałasavała bolšaja pałova ŭsich apytanych».
U apošnim numary «Sovietskoj Biełoruśsii» redakcyjny artykuł pryśviečany apytańniu Niezaležnaha instytuta sacyjalna-ekanamičnych i palityčnych daśledavańniaŭ nakont vynikaŭ prezidenckich vybaraŭ. Artykuł nazyvajecca «NISEPD: upeŭnienaja i adnaznačnaja pieramoha». «Niezaležny instytut sacyjalna-ekanamičnych i palityčnych daśledavańniaŭ (Vilnius), jakim kiruje praf. Aleh Manajeŭ, raspaŭsiudziŭ zroblenyja instytutam vyniki nacyjanalnaha apytańnia. Pa dadzienych instytuta, za A. Łukašenku prahałasavała bolšaja pałova ŭsich apytanych, jahonyja supierniki atrymali niaznačnuju ŭ paraŭnańni z A. Łukašenkam kolkaść hałasoŭ (U. Niaklajeŭ – 8,3%, A. Sańnikaŭ – 6,1%)», – havorycca ŭ artykule (źviartaje na siabie ŭvahu słovazłučeńnie «bolšaja pałova» – nn.by). – «NISEPD pryjšoŭ da vysnovy, što A. Łukašenka znoŭ z kałasalnym adryvam ad sapiernikaŭ vyjhraŭ prezidenckija vybary (što pradkazvali ŭsie apytańni sacyjołahaŭ) i heta nie padlahaje nijakamu sumnievu».
Naprykancy artykuła čytačoŭ zapeŭnivajuć u praŭdzivaści źviestak instytuta: «Usim viadoma, što NISEPD źjaŭlajecca niedziaržaŭnaj daśledčaj arhanizacyjaj i nieadnarazova zajaŭlaŭ ab svajoj nieanhažavanaści. Bolš za toje, NISEPD funkcyjanuje zusim nie na srodki biełaruskaha dziaržbiudžetu, a za košt atrymanych hrantaŭ. Možna śmieła śćviardžać, što NISEPD nikoli nie byŭ zaŭvažany ŭ schavanych simpatyjach da siońniašniaj biełaruskaj ułady, tamu, apublikavaŭšy vyniki svajho apytańnia, NISEPD nanios sakrušalny ŭdar pa haniebnych sprobach falsifikataraŭ vynikaŭ vybaraŭ».
Pikantnaść zaklučajecca ŭ tym, što pavodle apytańnia NISEPD za Łukašenku prahałasavaŭ 51% vybarščykaŭ. Pavodle ž ahučanych Centrvybarkamam dadzienych, za Łukašenku prahałasavali 79,65%. U situacyi, kali i chočacca i kolecca, aŭtar redakcyjnaha artykuła vykarystaŭ pryjom, apisany ŭ savieckim aniekdocie: Hazieta «Pravda» piša pra vyniki spabornictvaŭ pa biehu pamiž Leanidam Brežnievym i Ronaldam Rejhanam. «Hienieralny sakratar KPSS prybieh druhim, a prezident ZŠA – pieradapošnim».
