Skandał vakoł filma «Małakasosy» praz seksualnyja sceny ź niepaŭnaletnimi

Premjera amierykanskaha remiejku sieryjała «Małakasosy» pahražaje vylicca ŭ cenzurny skandał — praz pakaz adkrytych scen z udziełam niapoŭnahadovych ad padtrymki šou admaŭlajucca sponsary, a pravaabaroncy pahražajuć sudovymi pozvami.

Zapusk amierykanskaha remiejku brytanskaha sieryjała «Małakasosy» («Skins») vyliŭsia ŭ skandał: suprać šou, jakoje tolki što startavała ŭ efiry, pratestujuć hramadskija arhanizacyi, jakija pahražajuć sudovymi pozvami, a ŭčora jaho kinuła ŭžo treciaja sponsarskaja kampanija — da aŭtamabilnaj General Motors i sietki zakusačnych Taco Bell dałučyłasia Wrigley, jakaja zabaraniła rekłamavać padčas šou šakaładnyja batončyki Mars. «Kampanija vyrašyła nie pakazvać nijakaj svajoj rekłamy padčas hetaha šou, bo my nikoli nie padtrymlivali źmiest, jaki moh by abrazić našych klijentaŭ», — havorycca ŭ aficyjnym pres-relizie. Takimi mierkavańniami kiravalisia i astatnija kampanii.

Akramia rekłamadaŭcaŭ na baku aburanaj hramadskaści vystupiŭ i miedyjahihant Viacom, zasnavalnik MTV, jaki aściarožna paprasiŭ muzyčny kanał «prybrać častku najbolš adkrytych scen» u nastupnych epizodach šou.

Zrešty, ni ŭhavorvańni, ni pahrozy, ni adtok rekłamnych hrošaj pakul nijak nie paŭpłyvali na pazicyju samoha MTV. «My ŭpeŭnienyja, što „Małakasosy“ buduć i dalej radavać aŭdytoryju, dla jakoj hetaje šou było stvoranaje,

a rekłamadaŭcy buduć vykarystoŭvać rejtynh u svaich metach», — havorycca ŭ zajavie MTV. Druhaja sieryja sieryjała maje vyjści ŭ efir siońnia, u paniadziełak, 24 studzienia.

Premjera sieryjała «Małakasosy» adbyłasia na telekanale MTV na minułym tydni. Šou zrabiłasia niesumniennym chitom — jaho pahladzieła kala 3,3 miljona čałaviek, ale ŭ navinach «Małakasosy» źjavilisia zusim ź inšaj nahody. Jašče da premjery, jak tolki byŭ pradstaŭleny pašyrany trejler, amierykanskaja advakackaja hrupa «Televizijnaja rada baćkoŭ» (Parents Television Council, PTC) u svaim ahladzie apisała telesieryjał (najbližejšym anałaham jakoha možna nazvać rasijskuju «Škołu» Haj-Hiermaniki) jak «vielmi niebiaśpiečny». A paśla źjaŭleńnia šou ŭ efiry PTC padała pietycyju ŭ jurydyčnyja kamitety abiedźviuch pałat parłamienta ZŠA z prośbaj pačać rasśledavańnie pa faktach «mahčymaha seksu z udziełam niepaŭnaletnich».

U pryncypie, dadzienaja pracedura całkam moža vylicca ŭ realnyja sudovyja pracesy, što i prymusiła rekłamadaŭcaŭ jak maha chutčej admiežavacca ad padtrymki sieryjała.

Amierykanskija «Małakasosy» źjaŭlajucca remiejkam adnajmiennaha anhielskaha sieryjała, jaki z pośpiecham tranślujecca pa brytanskim płatnym ličbavym kanale E4. U im raskazvajecca pra tynejdžaraŭ 16–18 hadoŭ (z čym i źviazanaja zhadka «seksu niepaŭnaletnich»). Niahledziačy na vidavočnuju pravakacyjnaść, sieryjał atrymaŭ niekalki pryzoŭ brytanskich kina-i teleakademij; jaho rehularnaja aŭdytoryja składaje kala 900 tysiač čałaviek. U Brytanii sieryjał uchvalała presa, ale byli i inšyja vodhuki: jaho krytykavali za stereatypnych i nierealistyčnych piersanažaŭ, a taksama za ahresiŭnuju rekłamnuju kampaniju (jakaja atrymała premiju ad supolnaści markietołahaŭ).

Jakich-niebudź prablem z padletkami, jakija pahladzieli sieryjał, u Anhlii adznačana nie było. Tym nie mienš, u anhlijskaj movie zamacavaŭsia vyraz «skins party», jaki aznačaje varjackuju viečarynku ŭ styli hierojaŭ šou. U 2007 hodzie adna dziaŭčyna raźmiaściła ŭ sacyjalnaj sietcy MySpace zaklik ŭsim achvotnym pryjści da jaje na takoje śviata — zajavilisia kala 200 čałaviek, jakija nanieśli škodu, acenienuju ŭ 2 tysiačy funtaŭ sterlinhaŭ, zrešty, paśla jana skazała, što jaje profil byŭ uzłamany.

Pierš čym amierykancy vyrašyli rabić ułasnych «Małakasosaŭ», aryhinał byŭ častkova pakazany na kanale BBC America — praŭda, pierachod z płatnaha viaščańnia nie prajšoŭ dla šou biasśledna: byli vyrazanyja niekatoryja sceny i «zapikanaja» častka abscennaj leksiki.

gazeta.ru

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH