Treci kamitet Hienasamblei AAN pryniaŭ rezalucyju «Stanovišča ŭ halinie pravoŭ čałavieka ŭ Biełarusi». Praktyčna analahičnaja rezalucyja była pryniataja ŭ dačynieńni da Iranu.
Rezalucyju ŭ dačynieńni da Biełarusi inicyjavali ZŠA i krainy Eŭraźviazu. Za jaje pryniaćcio vystupili 70 krainaŭ, suprać – 31. Pradstaŭniki 67 delehacyj ustrymalisia ŭ chodzie hałasavańnia.
U abaronu Biełarusi vystupili Rasieja, Kuba, Kitaj, Iran, Syryja, Venesueła, Uźbiekistan i Sudan. Jany nazvali rezalucyju palityčna matyvavanaj i padkreślili, što jana nie spryjaje raźvićciu supracoŭnictva i dyjalohu ŭ sfery pravaabarončaj dziejnaści AAN.
Rasieja, Kuba i Kitaj pasprabavali skarystacca pracedurnymi praviłami, kab nie vynosić na hałasavańnie rezalucyju pa Biełarusi, adnak prapanova hetych krainaŭ nie prajšła.
Pradstaŭnica Finlandyi ŭ vystupie ad imia EZ zajaviła, što parušeńnie pravoŭ čałavieka ŭ Biełarusi jość instrumentam dasiahnieńnia palityčnych metaŭ i zaklikała ŭsie krainy padtrymać hetuju rezalucyju.
U rezalucyi «Stanovišča ŭ halinie pravoŭ čałavieka ŭ Biełarusi» havorycca, što ŭ krainie ŭsio čaściej vykarystoŭvajecca praktyka represij ŭ dačynieńni da pradstaŭnikoŭ apazycyi, viadziecca kryminalny pieraśled pravaabaroncaŭ, žurnalistaŭ i tych, chto vystupaje ad imia niaŭradavych arhanizacyj.
Jak adznačajecca ŭ tekście rezalucyi, biełaruskija ŭłady praciahvajuć parušać uziatyja «mižnarodnyja abaviazacielstvy što da praviadzieńnia svabodnych i spraviadlivych vybaraŭ». U suviazi z hetym krainy, jakija padtrymali rezalucyju, zaklikajuć aficyjny Miensk «pryvieści Vybarčy kodeks i zakanadaŭčuju bazu ŭ adpaviednaść ź mižnarodnymi standartami», – paviedamlaje navinavaja słužba AAN.
Fota un.org
