Žonka eks-kandydata na prezydenta Biełarusi, lidera Biełaruskaj sacyjał-demakratyčnaj partyi (Hramada) Alaksandra Kazulina prosić suśvietnuju supolnaść vyratavać jejnaha muža ad pahibieli.
«Siońnia ad kožnaha z vas zaležyć žyćcio majho muža, – viadziecca ŭ zvarocie. – Užo 39-ty dzień jon trymaje haładoŭku pratestu suprać isnaha dyktatarskaha režymu nielehitymnaha prezydenta A.Łukašenki. Za svaje palityčnyja pierakanańni A.Kazulin asudžany na piać z pałovaj hadoŭ źniavoleńnia. U krainie – praciahły kanstytucyjny kryzis. Sytuacyja z pravami čałavieka krytyčnaja. Treci kamitet Hieneralnaj asamblei AAN ź inicyjatyvy ZŠA, Kanady i Eŭraźviazu ŭchvaliŭ rezalucyju pra parušeńni pravoŭ čałavieka ŭ Biełarusi. Ja vielmi ŭdziačnaja za hety krok napierad. Moj muž pierakanany, što tolki Rada biaśpieki AAN moža paŭpłyvać na źmianieńnie sytuacyi ŭ krainie. Biełaruś – paŭnapraŭny čalec AAN i musić ličycca z rašeńniem Rady biaśpieki AAN. Tamu A.Kazulin źviartajecca z prośbaj, kab chacia b adna z krainaŭ «vialikaj vosiemki» vystupiła z prapanovaj pra pastanoŭku biełaruskaha pytańnia ŭ Radzie biaśpieki AAN. Siońnia ja zaklikaju z adčajnaj prośbaj zrabić vas usio, što ad vas zaležyć. Inačaj moj muž, jaki advažyŭsia procistajać dyktatarskamu režymu, moža zahinuć!»
25 listapada, na dzień narodzinaŭ A.Kazulina, jamu dazvolili karotkuju sustreču z žonkaj i dačkoj. Jany pieradali źniavolenamu palityku ciopłuju kurtku dy pradukty na vypadak vychadu z haładoŭki. «My jaho prasili kinuć haładać. Adnak muž skazaŭ, što budzie haładać da taje pary, pakul jahonych patrabavańniaŭ nia vykanajuć», – raspaviała I.Kazulina.
