Kastuś Sieviaryniec, baćka źniavolenaha ŭ SIZA KDB palityka, ličyć, što paŭtara miesiaca listy da Paŭła prosta nie dachodzili.Padstavy, kab hetak mierkavać, daje apošni synaŭ dopis — 17-ha lutaha baćki atrymali ad jaho čarhovy list.
Pavodle Kastusia Sieviarynca, u liście napisana: "Atrymaŭ dva matulinych listy ad 6-ha i 9-ha lutaha. Narešcie! Vielmi-vielmi-vielmi rady!"
Spadar Sieviaryniec kaža, što listy da Paŭła jany z maci pišuć amal štodnia, ad samaha dnia źniavoleńnia 19-ha śniežnia. I ličyć aburalnym, što dvuchbakovaj suviazi z synam nie było amal paŭtara miesiaca: baćki za hety čas atrymali ad Paŭła Sieviarynca 5 listoŭ, a jon z domu — tolki dva, pryčym zusim niadaŭna. Adna ź vierahodnych pryčynaŭ, ličyć Kastuś Sieviaryniec, — heta jahonyja vieršy, jakija jon pierasyłaje synu i jakija mahli padacca supracoŭnikam KDB zanadta palityzavanymi.
Charčovyja pieradačy, jak vynikaje ź listoŭ, Pavał atrymlivaje rehularna. Adnak prablemy ź listavańniem stali dla baćkoŭ niepryjemnaj niečakanaściu: Kastuś Sieviaryniec viedaje, što źniavolenamu pišuć nia tolki jany, ale i mnostva inšych ludziej, jakija chočuć jaho padtrymać. I toje, što Pavał Sieviaryniec nie atrymlivaje adrasavanaj jamu karespandencyi, baćki ličać dadatkovym psychalahičnym ciskam na palitviaźnia.
