Adziny siońnia biełaruskamoŭny kłas u Baranavičach u SŠ №14 – heta ŭsiaho try dziaŭčynki-pieršakłaśnicy: Jasia Małaščanka, Alisa Filipčyk i Vieranika Michalčuk. Letaś ich baćki pažadali navučać svaich dzietak pa-biełarusku.
«U siońniašniaj situacyi hetyja try biełaruskamoŭnyja pieršakłaśnicy na ŭvieś amal 170-tysiačny horad – sapraŭdnyja hieroi», – raspavioŭ Intex-press staršynia Baranavickaj filii Tavarystva biełaruskaj movy imia Francyska Skaryny Viktar Syryca.
Siońnia jon razam ź inšymi baranavickimi siabrami TBM naviedalisia da dziaŭčynak, kab pavinšavać ich ź Mižnarodnym dniom rodnaj movy. Siabry tavarystva zahadali vučniam niekalki biełaruskich zahadak i padaravali biełaruskija čytanki. Baranavickaja bard Halina Jaraševič taksama ŭznaharodziła vučanic viazanymi lalkami-vasilinkami ź simvaličnymi vałoškami.
Sałodkim finalnym akordam sustrečy staŭsia vialiki tort sa śviatočnym nadpisam: «Z dniom rodnaj movy!» Hetyja słovy dziaŭčynki imknulisia pračytać navypieradki.
«Siońnia dziaŭčynki ŭžo całkam asvoilisia, na zaniatkach paśpiachova zajmajucca ŭtroch, a na pierapynkach baviacca razam z astatnimi vučniami, – raspaviała Intex-press nastaŭnica i maci adnoj z hetych dziaŭčynak Iryna Michalčuk. – A pa pieršym časie navat mnie było krychu niazvykła zajmacca ŭ takim maleńńkim i całkam biełaruskamoŭnym kłasie. Vučusia razam ź imi…»
