Blizkaja da łukašenkaŭcaŭ hazeta «Obozrievatiel» nadrukavała pałasnyja interviju z «patencyjnymi kandydatami ŭ prezydenty» Siarhiejem Hajdukievičam i Alaksandram Kazulinym.
S.Hajdukievič prafesijna chvalić Łukašenku i hanić abjadnanuju apazycyju. Jon pryznaje, što prezydentam u 2006 hodzie jon «nia stanie», ale śćviardžaje, što «zarabiŭ prava na parlamenckuju trybunu».
A.Kazulin, u svaju čarhu, vyražaje hatoŭnaść «vystupić z dakładam na Ŭsiebiełaruskim narodnym schodzie». Taksama jon paviedamlaje, što ŭ vypadku abrańnia prezydentam jaho druhi dekret budzie pra toje, što «partrety pieršaha prezydenta Respubliki Biełarusi mohuć zastavacca tam, dzie jany siońnia visiać».
Mierkavańnie A.Kazulina pra A.Milinkieviča, ź jakim jon viadzie pieramovy pra kaardynacyju na vybarach: «jon vydavaŭ hranty» i «źjaŭlajecca vyłučencam Partyi BNF». Kaža: «Ja liču: tyja, chto zmahajecca z režymam, nasamreč vielmi niabłaha ź im zžylisia». I narešcie: «Ja suprać luboha, navat superprazachodniaha scenaru, jaki nam naviazvajecca».
Žurnalistka «Obozrievatiela» spasyłajecca na «daśledavańni astrolaha», što drukavalisia ŭ minułym numary hazety, pavodle jakich Kazulinu «pieršaha miesca nie vidać». Voś što na heta adkazvaje A.Kazulin:
«Što datyčyć astralahičnych prahnozaŭ, to ja jak navukoviec sam cikaŭlusia astralohijaj i padtrymlivaju siabroŭskija adnosiny z bujnymi specyjalistami ŭ hetaj halinie viedaŭ. Mahu adznačyć, što sp.Łukašenka karystajecca pasłuhami hramatnych astrolahaŭ. I daty 9.09.2001 i 19.03.2006, niahledziačy na vonkavuju nielahičnaść ich pryznačeńniaŭ, spryjalnyja dla jaho». Ale A.Kazulin pradrakaje A.Łukašenku prablemy padčas nastupnaha terminu, u vyniku čaho toj «abaviazany budzie kardynalna źmianić svaje padychody i znajści novych sajuźnikaŭ».
Hazeta «Obozrievatiel» vydajecca biznesoŭcam Siarhiejem Atroščankam. U svoj čas chadzili čutki, što jana była stvoranaja z zhody Rady bieśpiaki.
