Łukašenkaŭskaje ahienctva BiełTA nadrukavała vytrymki ź intervju Alaksandra Łukašenki amierykanskaj haziecie «Vašynhton post». BiełTA pieradrukavała nie ŭsie vykazvańni Łukašenki.Naprykład, havoračy ab prezidenckich vybarach, Łukašenka zajaŭlaje: «Pytańnie ŭ tym, što kandydaty havaryli. Jany kazali, što Łukašenku treba paviesić» [na samoj spravie nivodzin kandydat takoha nie kazaŭ — NN].
U inšym momancie žurnalistka spytałasia ab pary źniavolenych, u jakich jość trochhadovy syn.
Łukašenka adkazaŭ, što «nie viedaje takich vypadkaŭ», i pierapytaŭsia ŭ žurnalistki, pra kaho havorka, maŭlaŭ, jon nie viedaje takich siemjaŭ, u jakich dzicia zastałosia b biez nahladu. Kali žurnalistka pakazała, što viedaju situacyju, adkazała, što havorka pra Chalip i Sańnikava. Łukašenka na heta skazaŭ, što «pravieryć hetuju infarmacyju i daść zahad pravieryć»[raniej Łukašenka zajaŭlaŭ, nie nazyvajučy proźviščaŭ, što jany tym dziciem i nie zajmalisia — zajmalisia palitykaj i badzialisia pa śviecie, a dzicia rasło ŭ babuli ź dziadulem]. Paźniej u tym samym intervju Łukašenka nazvaŭ Sańnikava j Chalip hałoŭnymi arhanizatarami Płoščy i pryznaŭ, što Chalip siadzieła, a paśla jaje vypuścili.
Žurnalistka zaviała taksama havorku pra rehistracyju, dakładniej, masavuju nierehistracyju hramadskich abjadnańniaŭ. Łukašenka adkazaŭ joj, hledziačy ŭ vočy, što nijakich prablemaŭ tut niama.
«Heta niapraŭda, — nie vytrymała žurnalistka. — Jak nakont Biełaruskaj Chryścijanskaj Demakratyi?».
«U Biełarusi Chryścijanskaja Demakratyja, moža, nikoli nie budzie zarehistravanaja. Jany ŭdzielničali ŭ buncie. Jany nie chryścijanskija demakraty, jany bandyty», —adkazaŭ tady Łukašenka.
Na pytańnie «Čamu vy vyhnali amierykanskaha pasła ŭ 2008 hodzie?» Łukašenka adkazvaje: «Našto nam patrebny pasoł, jaki arhanizuje dziejańni piataj kałony?»
U astatnim Łukašenka byŭ zvykła demahahičnym. Jon zajaviŭ, što demakratyi ŭ Biełarusi bolš, čym u ZŠA, i vučyŭ amierykancaŭ žyć.
Jon to naskokvaŭ, to płakaŭsia, adznačaje hazieta va ŭstupie da tekstu intervju.
«Skažycie amierykancam, što my vysokaj dumki pra ich. My nikoli nie budziem budavać žaleznaj zasłony, kab amierykancy ŭ Biełaruś nie pryjazdžali», — skazaŭ Łukašenka ŭ kancy hutarki.
