U Senat ZŠA 9 sakavika byŭ uniesieny prajekt rezalucyi pa Biełarusi ŭ suviazi ź pieraśledam apazycyi i demakratyčnych aktyvistaŭ režymam Alaksandra Łukašenki. Siarod sponsaraŭ prajektu znachodziacca senatary Dyk Derbin, Džozef Liberman, Džon MakKejn, Bendžamin Kardzin.
Rezalucyja asudžaje "nielehitymnyja" i "ašukanskija" prezydenckija vybary 19 śniežnia 2010 dy zaklikaje da vyzvaleńnia ŭsich palitviaźniaŭ, spynieńnia pieraśledu apazycyi i praviadzieńnia ŭ Biełarusi novych vybaraŭ u adpaviednaści ź mižnarodnymi standartami.
Rezalucyja nastojliva zaklikaje prezydenta ZŠA i dziaržsakratara ZŠA kaardynavać palityku ZŠA adnosna Biełarusi z palitykaj Eŭraźviazu; uznavić techničnuju i materyjalnuju padtrymku apazycyi i hramadzianskaj supolnaści ŭ Biełarusi; pašyryć amerykanski śpis słužbovych asobaŭ Biełarusi, adkaznych za pieraśled apanentaŭ režymu paśla 19 śniežnia 2010, i nakłaści metanakiravanyja sankcyi na hetyja asoby dy ich siamiejnikaŭ; vyznačyć dalejšyja pradpryjemstvy, jakija ŭzbahačajuć režym Alaksandra Łukašenki, dy zabaranić handal ź imi i zamarozić ich aktyvy.
Rezalucyja nastojliva zaklikaje Eŭraźviaz dałučycca da amerykanskich sankcyjaŭ suprać "Biełnaftachimu" ("Lakafarby" i "Škłovałakna"); spynić usie prajekty ŭ adnosinach da biełaruskich uładaŭ, adkaznych za padaŭleńnie apazycyi i parušeńni pravoŭ čałavieka, dy vyklučyć biełaruskija słužbovyja asoby z udziełu ŭ sustrečach Uschodniaha partnerstva; pašyryć eŭrapiejski śpis słužbovych asobaŭ Biełarusi, adkaznych za pieraśled apanentaŭ režymu paśla 19 śniežnia 2010, i nakłaści metanakiravanyja sankcyi na hetyja asoby dy ich siamiejnikaŭ.
Rezalucyja zaklikaje ŭrad Litvy, jakaja staršyniuje ŭ ABSE ŭ 2011, učynić svaim pryjarytetam viartańnie Ofisa ABSE ŭ Miensk.
Rezalucyja taksama zaklikaje Mižnarodnuju chakiejnuju federacyju zabrać u Biełarusi prava na arhanizavańnie čempijanatu śvietu pa chakiei ŭ 2014 hodzie, kali biełaruskija ŭłady nia vyzvalać usich palitźniavolenych.
