50 radkoŭ novaha hałoŭnaha redaktara
«U podły čas niaprosta być niapodłym», – piša Hienadź Buraŭkin, viečaryna jakoha sabrała na tydni anšlah u Pałacy mastactvaŭ. Ludzi pryjšli, choć da apošniaha nie było peŭnaści, ci dazvolać imprezu. Uvohule, tydzień minuŭ pad znakam drobnych podłaściaŭ: apahanili łavu Klintana ŭ Kurapatach; vosiem razoŭ spyniali moładź, što vandravała pa miaścinach Słuckaha paŭstańnia ; zapeckali Milinkieviču farbaj mašynu. Pajšli syhnały, što sacyjalnym rabotnikam zahadana sačyć za palityčnymi nastrojami pensijaneraŭ. Pryčyna jasnaja: sacyjolahi dyjahnastujuć stareńnie režymu. Jaho pačynajuć padtrymlivać pieravažna tyja, «kamu žyć dobra».
I ź inšaha boku, dośvied haradzienskich katalikoŭ, jakija šaścidzionnaj haładoŭkaj dabilisia taho, čaho dziesiać hadoŭ nie mahli damahčysia zvyčajnym šlacham, paćvierdziŭ daviedzienaje ŭžo pratestantami z «Novaha žyćcia», viciebskimi pradprymalnikami. Dziaržava lubym sposabam unikaje publičnych kanfliktaŭ z hramadzianami pa-za palityčnym polem.
Haładoŭki usio čaściej nazyvajuć «apošnim efektyŭnym srodkam» u adstojvańni pravoŭ asoby pierad dziaržavaj. Dyktatura – heta sutyknieńnie z uładaj adzin na adzin, biez amartyzataraŭ u vyhladzie hramadzkich arhanizacyj, sudoŭ, zakonu ŭrešcie. I śmiełaść asoby budzie strymlivać dziaržavu, pakul ich kanflikt maje rozhałas. To bok, pakul isnujuć niezaležnyja ŚMI.
Tut chavajecca adkaz na pytańnie: ci nia varta, zvažajučy na ŭcisk, niemahčymaść raspaŭsiudžvacca, a časta i drukavacca, pieratvaryć hazety ŭ «bajavyja listki», vychodzić padpolna i zajmacca kontrahitacyjaj? Nia varta. «Nia budziem pisać hromka. Budziem spakojnie, ćviorda kidać usim praŭdu ŭ vočy, pastarajemsia być ciarplivymi i panavać nad saboju: niachaj chałodny rozum mocna trymaje ŭ rukach haračaje serca». Kreda, prahałošanaje zasnavalnikami «Našaj Nivy» sto hadoŭ tamu, aktualnaje dahetul. Aktualnym zastaŭsia i ich zaklik da čytačoŭ: padtrymlivajcie nas! Rabota praciahvajecca.
Andrej Skurko
?
Da ŭvahi čytačoŭ
Z 1 śniežnia hałoŭnym redaktaram hazety «Naša Niva» staŭ Andrej Skurko. A.Skurko naradziŭsia ŭ 1978 u miastečku Kryvičy na Miadzielščynie. Jon skončyŭ biełaruskuju filalohiju BDU. Aŭtar «Našaj Nivy» ad 1998, ad 2000-ha – namieśnik hałoŭnaha redaktara. U 2006 h. byŭ abrany namieśnikam staršyni Biełaruskaha PEN-Centru.
