Papiarednim rasśledavańnie HUUS Minharvykankama pa materyjałach KDB raspačatyja adrazu dźvie kryminalnyja spravy ŭ dačynieńni da advakata Taćciany Ahiejevaj, jakuju try miesiacy tamu Miniust pazbaviŭ licenzii.
Nahadajem, što ŭ lutym hetaha hodu Ministerstva justycyi pazbaviła licenzijaŭ adrazu čatyroch advakataŭ, jakija mieli dačynieńnie da abarony abvinavačanych pa spravie ab masavych biesparadkach padčas prezidenckich vybaraŭ 19 śniežnia 2010 hodu. U niamiłaść trapili Aleh Ahiejeŭ, jaki baraniŭ byłoha kandydata ŭ prezidenty Alaksieja Michaleviča, jahonaja maci Taćciana Ahiejeva, Uładzimir Toŭścik i Tamara Harajeva — byłyja advakaty Iryny Chalip.
Pavodle Miniustu, rašeńnie było pryniataje pa vynikach praviedzienaj ministerstvam płanavaj pravierki dziejnaści advakataŭ Minskaj haradskoj kalehii, padčas katoraj «byli ŭstanoŭlenyja hrubyja i niesumiaščalnyja sa zvańniem advakata parušeńni zakanadaŭstva». Tak, dziejańnie licenzijaŭ Aleha Ahiejeva i Taćciany Ahiejevaj było spynienaje «za hrubyja parušeńni paradku afarmleńnia pahadnieńniaŭ na akazańnie jurydyčnaj dapamohi, pieraškody licenzujučym orhanam u praviadzieńni mierapryjemstvaŭ pa kantrolu za vykanańniem zakanadaŭstva, jakoje vyjaviłasia ŭ pradstaŭleńni niedakładnych źviestak». Uładzimir Toŭścik i Tamara Harajeva pazbaŭlenyja licenzij «za hrubyja parušeńni zakanadaŭstva ab licenzavańni, jakija vyjavilisia ŭ admovie ad akazańnia jurydyčnaj dapamohi Irynie Chalip». Pry hetym, jak patłumačyŭ «Jeŭraradyjo» baćka Iryny Chalip, admovy ŭ abaronie z boku advakataŭ nie było.
«Mianie ŭvohule ździviła hetaja historyja. Tamu što ŭsie dziejańni ministerstva vyhladajuć prosta absurdnymi. Čaho jany raptam raschvalavałasia? Adkul u ich takija źviestki? Pierš za ŭsio, napeŭna, treba było raspytać ich klijentaŭ, jak heta adbyvałasia. A potym vynosić niejkija rašeńni. Heta rašeńnie absalutna biespadstaŭnaje. Toŭścik nikoli nie admaŭlaŭsia vieści spravu majoj dački!» -- zajaviŭ Uładzimir Chalip.
Praz try miesiacy paśla pazbaŭleńnia licenzii ŭ dačynieńni da advakataŭ pačali zavodzić kryminalnyja spravy. Pieršaj padazravanaj stała Taćciana Ahiejeva. Joj inkryminujecca tyja ž dziejańni, u jakich jaje abvinavačvaŭ Miniust, ale ŭžo nie sa spasyłkaj na materyjały płanavaj pravierki ministerstva, a na niejkija materyjały KDB. Pry hetym vyklikaje sama mieniej ździŭleńnie toje, što dziejnaść advakataŭ naohuł nie adnosicca da śfiery intaresaŭ orhanaŭ dziaržbiaśpieki. Navat inkryminavany joj artykuł čysta milicejski.
Taćcianie Ahiejevaj inkryminujecca ździajśnieńnie złačynstva, praduhledžanaha č.1 art.380 (padrobka, vyrab, vykarystańnie albo zbyt padroblenych dakumientaŭ, štampaŭ, piačatak, błankaŭ) i č.2 art.380 (padrobka, vyrab, vykarystańnie albo zbyt padroblenych dakumientaŭ, štampaŭ, piačatak, błankaŭ, ździejśnienyja paŭtorna abo hrupaj asobaŭ pa papiaredniaj zmovie) Kryminalnaha kodeksu Biełarusi.
Nibyta pa źviestkach KDB, Taćciana Ahiejeva letam 2010 hodu, źjaŭlajučysia advakatam jurydyčnaj kansultacyi Zavodskaha rajonu, uniesła zahadzia iłžyvyja źviestki ŭ pahadnieńnie pa kryminalnaj spravie i asabovy rachunak advakata, padaŭšy ich u buchhałteryju Prezidyuma Minskaj kalehii advakataŭ u jakaści padstavy dla štomiesiačnaha naličeńnia zarobku. Anałahičnyja dziejańni advakat byccam by ździejśniła i ŭ vieraśni 2010 hodu.
Pakul składana skazać, nakolki abhruntavanyja pretenzii KDB. Možna tolki spadziavacca, što ŭ hetym raźbiarucca śledčyja i sud. Ale ŭžo siońnia vyklikaje ździŭleńnie jak cikavaść KDB da takich drobiaziaŭ, tak i niejkaja płanavaja pravierka Ministerstva justycyi, pad dacham usio taho ž KDB.
Źviestak ab uzbudžeńni kryminalnych spravaŭ u dačynieńni da inšych advakataŭ pakul niama. Adnak, jak vyśvietliŭ «Ježiednievnik», na datyčnaść da ździajśnieńnia hetaha złačynstva ŭžo praviarajecca i syn Taćciany Ahiejevaj, jaki abaraniaŭ Alesia Michaleviča.
