Pra Mikałaja Dziadka, jakoha 27 maja pakarali 4,5 hadami kałonii, raspaviała jaho dziaŭčyna.
Mikałaj Dziadok.
«NN»: Lera, prysud byŭ niečakanaściu albo nie spadziavalisia na apraŭdańnie?
Lera: Kali prajšli pieršyja miesiacy ŭtrymańnia Koli pad vartaj, ja dumała, što jamu daduć piać hadoŭ. Ale siońnia dla mianie było niečkanaściu, što sudździa pa artykule 218 č. 2 apraŭdała jaho. Nasamreč nie było nijakich dokazaŭ paškodžańnia majomaści połymiem, jak abvinavačvali. Chacia ja navat hetaha nie čakała. Ale pahladzicie, jak jany zrabili. Pa č.2 art. 218 prakuror patrabavaŭ tolki try hady, chacia pa artykule «chulihanstva» patrabavaŭ 4,5 hady. Tym samym padstrachavaŭsia na vypadak, kali pa art. 218 apraŭdajuć. Što i vyjšła.
«NN»: Čym vy možacie patłumačyć taki termin?
Lera: My bačyli na pracesie, što prychodzili ludzi, jakija kazali pra svoj udzieł u akcyjach anarchistaŭ, što kidali fajery. Ale jany prachodzili tolki śviedkami. Vidavočna, što śpiecsłužby vybrali pa navodcy ci niejak pa-inšamu kankretna hetych maładych ludziej. Heta nie 18-hadovyja chłopcy, jakija dałučylisia da anarchistaŭ tolki tamu, što heta modna. Naadvarot. I vyrašyli zrabić ź ich samych hałoŭnych, arhanizataraŭ anarchisckaha ruchu. Chacia ŭsio heta na pracesie raźlaciełasia. Navat śviedki kazali, što ŭ anarchisckim kole rašeńni prymajucca sumiesna. I nijakich arhanizataraŭ niama. Dla śledstva heta było ciažka ŭjavić. Ci nie ŭpieršyniu jany sutyknulisia z tym, kali niama čałavieka, adkaznaha za ŭsio.
«NN»: Mikałaja ŭziali pad vartu 3 vieraśnia 2010 hoda. Uvieś hety čas ź im była suviaź, listy pisaŭ?
Lera: Kali jon znachodziŭsia ŭ izalatary na Akreścina, da 24 vieraśnia nie było mahčyma ź im listavacca, bo tam papieru i asadki nie dajuć. I tamu dziŭnymi padavalisia słovy prakurora na sudzie, jaki pytaŭsia, čamu Mikałaj nie pisaŭ skarhi. My kantaktavali ź im tolki praz adkavakata. A paśla 24 vieraśnia listavańnie naładziłasia. Praŭda, kali Kolu ŭ Žodzina pieraviali, list tydzień išoŭ da jaho i paśla tydzień ad jaho.
«NN»: Mikałaj prysłaŭ u NN list sa słovami padtrymki haziety. Jon stały čytač ci tolki za kratami staŭ im?
Lera: U biełarusaŭ vybaru niezaležnych haziet niama. Na svabodzie Kola čytaŭ sajt «Našaj Nivy». Vypisać jamu ŭ źniavoleńni drukavanuju viersiju była maja inicyjatyva. Taksama vypisała «Narodnuju Volu» i «Biełhazietu». A paśla jon paprasiŭ jašče i «Saŭbiełku» vypisać. Ale praz paŭhoda admoviŭsia dalej hazietu čytać. Maŭlaŭ, vanituje ad jaje.
«NN»: Da aryštu Mikałaj vučyŭsia ŭ EHU. Čamu abraŭ hetuju VNU?
Lera: Jon skončyŭ jurydyčny kaledž. A pa jaho zakančeńni pastupiŭ na 3 kurs jurfaka BDU, na zavočnaje adździaleńnie. Pravučyŭsia hod i kinuŭ, bo jamu tam nie padabałasia. Pastupiŭ na zavočnaje ŭ EHU pa śpiecyjalnaści «Palitałohija». I tym hodam, jaki jon paśpieŭ advučycca, byŭ vielmi zadavoleny. EHU dla jaho stała krokam napierad.
Sprava ŭ tym, što jon cikaviŭsia nie tolki idejami anarchizmu, a ŭsio astatniaje adkidaŭ. Pry pieratrusie ŭ nas na kvatery znajšli šmat knižak Lenina, pra nacyjanalizm i h.d. Śledčyja byli šakavanyja takoj «sumieśsiu».
«NN»: 4,5 hady — termin praciahły. Što budziecie rabić ciapier? Čakać?
Lera: Kaniečnie. U mianie było dastatkova času padumać, ci zmahu ja. Vyrašyła čakać. Ja navat paličyła, što praz 2\3 terminu možna sprabavać vyzvalicca ŭmoŭna-daterminova. Dzieviać miesiacaŭ jon užo adsiadzieŭ. Ciažka, što heta budzie ŭzmocnieny režym. Heta značyć, što dazvalajucca tolki dva doŭhaterminovyja spatkańni na hod (pry ahulnym režymie — try razy). Ale kali źniavoleny biare ŭdzieł u samadziejnaści, vykonvaje pracoŭnyja płany, to mohuć pieravieści na palepšanyja ŭmovy. Dumaju, što jon budzie staracca.
***
Siońnia ŭ sudzie Zavodskaha rajona stalicy byŭ vyniesieny prysud pa spravie minskich anarchistaŭ.
Ihar Alinievič asudžany na 8 hadoŭ kałonii ŭzmocnienaha režymu z kanfiskacyjaj aŭtamabila. Mikałaj Dziadok — na čatyry hady i šeść miesiacaŭ kałonii ŭzmocnienaha režymu, Alaksandr Franckievič — na 3 hady kałonii ŭzmocnienaha režymu, Maksim Vietkin budzie pakarany čatyrma hadami abmiežavańnia voli z nakiravańniem va ŭstanovu adkrytaha typu (chimija), Jaŭhien Silivončyk — 1,5 hadami abmiežavańnia voli z nakiravańniem va ŭstanovu adkrytaha typu.
Taksama z usich ich budzie spahnana 100 młn rubloŭ pakryćcia materyjalnaj škody (roznymi dolami).
Prakuror patrabavaŭ prysudzić Mikałaja Dziadka da šaści hadoŭ kałonii ŭzmocnienaha režymu, Ihara Alinieviča — da dzieviaci hadoŭ kałonii ŭzmocnienaha režymu z kanfiskacyjaj aŭtamabila, Alaksandra Franckievič — da piaci hadoŭ kałonii ŭzmocnienaha režymu, Maksima Vietkina — da čatyroch hod abmiežavańnia voli, Jaŭhiena Silivončyka — da troch hadoŭ abmiežavańnia voli.
Ich vinavacili ŭ šerahu złačynstvaŭ.
Mikałaja Dziadka abvinavačvali ŭ arhanizacyi antymilitarysckaha šeścia pad Hienieralnym štrabam Respubliki Biełaruś 19 vieraśnia 2009 h. (č.2 art.339 KK), napadzie na kazino «Šanhry Ła» 5 śniežnia 2009 h. (č.2 art.339 i č.2 art.218 KK), na budynak Fiederacyi prafsajuzaŭ 30.04.2010 h. (č.2 art.339 i č.2 art.218 KK).
Ihara Alinieviča abvinavačvali ŭ arhanizacyi antymilitarysckaha šeścia pad Hienieralnym štrabam Respubliki Biełaruś 19 vieraśnia 2009 h. (č.2 art.339 KK), napadzie na kazino «Šanhry Ła» 5 śniežnia 2009 h. (č.2 art.339 i č.2 art.218 KK), padpale dźviarej filijała «Biełarusbanka» 31.05.2010 h. (č.2 art.339 i č.3 art.218 KK), napadzie na pasolstva Rasii ŭ Minsku 30 žniŭnia 2010 h. (č.2 art.339 i č.3 art.218 KK) i napadzie na izalatar na Akreścina 6 vieraśnia 2010 h. (č.2 art.339 i č.2 art.218 KK).
Alaksandra Franckieviča abvinavačvali ŭ arhanizacyi antymilitarysckaha šeścia pad Hienieralnym štrabam Respubliki Biełaruś 19 vieraśnia 2009 h. (č.2 art.339 KK), napadzie na aporny punkt milicyi ŭ Salihorsku 9 sakavika 2010 h. (č.2 art.339 i č.2 art.218 KK) — zdymaŭ na videa, na budynak Fiederacyi prafsajuzaŭ 30.04.2010 h. (č.2 art.339 i č.2 art.218 KK), uzłomie sajta harvykankama Navapołacka (č.2 art.349, art.354, č.2 art. 351 KK).
Maksima Vietkina abvinavačvali ŭ padpale dźviarej filijała «Biełarusbanka» 31.05.2010 h. (č.2 art.339 i č.3 art.218 KK) — zdymaŭ na videa, napadzie na rasijskaje pasolstva 30 žniŭnia 2010 h. (č.2 art.339 i č.3 art.218 KK).
Jaŭhiena Silivončyka abvinavačvali ŭ napadzie na aporny punkt milicyi ŭ Salihorsku 9 sakavika 2010 h. — raźbiŭ škło prentam (č.2 art.339 i č.2 art.218 KK).
Dziadok, Franckievič i Alinievič viny nie pryznali, Vietkin i Silivončyk — častkova (nie było namieru psavańnia majomaści). Apošniaje słova anarchistaŭ možna pračytać tut.
