Zbornyja Biełarusi i Francyi na «Dynama» zhulali adboračny matč da čempijanatu Jeŭropy.
Mnoha ci mała, ale da nas u hości pryjechali čempijony śvietu 1998 i čempijony Jeŭropy 2000. Ciapierašni trenier francuzaŭ Łaran Błan byŭ jakraz u składzie toj słavutaj kamandy. Hledačoŭ na matč pryjšło dastatkova mnoha. Mabyć, stadyjon byŭ zapoŭnieny pracentaŭ na 80. Hetamu spryjała i dobraje nadvorje, i nie duža darahija bilety. Zajaŭziatary dobra padtrymlivali svaju kamandy.
Biełaruskija
Na hety raz Štanhie vyrašyŭ pakinuć u zapasie hieroja paryžskaj hulni. Zatoje ŭ asnoŭnym składzie źjavilisia absalutny debiutant Vital Trubiła, a napadajučym vyjšaŭ małady Andrej Varankoŭ. Paśla hulni niemiec skaža, što nam pašancavała z takimi futbalistami.
Našy chłopcy pačali vielmi aktyŭna. Było bačna ichniaje imknieńnie być pieršymi na miačy, začapicca za supiernika. Było adčuvańnie, što hoł vyśpiavaje.
Na spravie tak i apynułasia. Na dvaccataj chvilinie Cimoch Kałačoŭ vydatna naviesiŭ z fłanha sa štrafnoha. Miač trapiŭ u nahu francuzu Abidala, a ŭžo ad jaje ŭ varoty. Aŭtahoł.
Praŭda, adyhracca hości zmahli imhnienna. Voś što značyć mieć u składzie takoha futbalista, jak Małuda. Jon vycisnuŭ hoł z paŭmomantam.
Naprykancy pieršaha tajma było bačna, što biełarusy trochu stamilisia. Stali mienš ruchacca, prajhravać adzinaborstvy. Ale francuzy duža nie napružvali.
Druhi tajm prajšoŭ pad terytaryjalnaj pieravahaj haściej. Tym nie mienš stopracentnych momant la bramy Vieramko i nie ŭzhadaješ. Francuzy nie zasłužyli pieramohi, biełarusy — projhryšu. Ničyja absalutna zakanamiernaja.
Łaran Błan potym skazaŭ, što biełarusy vielmi dobra hladzielisia ŭ abaronie. Štanhie byŭ zadumiennym. Skazaŭ, što vyhadu ad hetaj ničyi my atrymajem tolki ŭ vypadku pieramohi nad Luksiemburham.
Hety vynik pakidaje zbornaj dobryja šancy na druhoje miesca ŭ hrupie. Ciapier raskład vyhladaje nastupnym čynam: Francyja — 13 bałaŭ (6 matčaŭ), Biełaruś — 9 (6), Ałbanija — 8 (5), Rumynija — 8 (6), Bośnija — 7 (5), Luksiemburh — 1 (6).
Nastupny matč biełarusy praviaduć doma ź Luksiemburham 7 červienia.
