Mižnarodny valutny fond pakul nie abmiarkoŭvaŭ abjomy finansavaj dapamohi Biełarusi ŭ miežach mahčymaj novaj prahramy supracoŭnictva. Pra heta zajaviŭ kiraŭnik misii MVF pa Biełarusi Krys Džarvis 13 červienia na bryfinhu ŭ Minsku.
«My pačali pieramovy ab mahčymaj novaj prahramie. Nas čakaje praciahły šlach. Nieabchodnaje abmierkavańnie dalejšaj makraekanamičnaj palityki ŭ Biełarusi. Nam taksama nieabchodna damovicca pra strukturnyja pieraŭtvareńni, kab zabiaśpiečyć efiektyŭnaść pradpryjemstvaŭ i finansavaj sistemy, za košt čaho ŭ dalejšym možna vyjści na ŭstojlivyja i vysokija tempy rostu», — skazaŭ Džarvis.
Jon padkreśliŭ, što dziaržaŭnyja orhany pavinny z usioj rašučaściu iści na ekanamičnyja i strukturnyja pieraŭtvareńni.
Pakul ni pra jakija terminy pačatku realizacyi prahramy damoŭlenaściaŭ nie było. Razam z tym, na dumku Džarvisa, u ciapierašnich umovach «nieabchodna dziejničać jak maha chutčej, kab dabicca stabilizacyi ekanamičnaj situacyi ŭ krainie».
Što tyčycca abjomaŭ mahčymaj dapamohi,
to ŭ miežach ciapierašniaha vizitu misii istotnych pieramoŭ pa hetym pytańni nie adbyvałasia.Jak rastłumačyŭ Džarvis, heta źviazana z tym, što abjom takoj dapamohi budzie zaležać ad stanu i patrebnaści płaciežnaha bałansu Biełarusi, a taksama ad surjoznaści tych mierapryjemstvaŭ, jakija buduć praduhledžanyja prahramaj.
«My nie tak daloka prasunulisia ŭ našych pieramovach, kab abmiarkoŭvać abjomy finansavaj dapamohi», — zaznačyŭ kiraŭnik misii MVF.
Jon padkreśliŭ nieabchodnaść uzhadnić surjoznyja zachady ŭ śfiery strukturnych pieraŭtvareńniaŭ i makraekanamičnaj palityki da pačatku realizacyi prahramy. «My taksama pavinny być upeŭnienyja ŭ tym, što ŭsie zacikaŭlenyja baki — prezident, urad i Nacyjanalny bank — poŭnyja rašučaści hetuju prahramu vykonvać. I tut vielmi važny adziny padychod», — padkreśliŭ Džarvis.
Pavodle jaho słoŭ, novaja prahrama supracoŭnictva ź Biełaruśsiu moža być raźličanaja na try hady. U liku ŭsiaho ŭ bankaŭskaj śfiery Biełarusi nieabchodna budzie zabiaśpiečyć farmiravańnie dobra pracujučaha Banka raźvićcia, na jaki laža vydzialeńnie novych kredytaŭ u miežach dziaržprahram, jakija zaraz pa subsidavanych staŭkach vydajucca kamiercyjnymi bankami.
U śfiery pryvatyzacyi vialikuju ŭvahu MVF rekamienduje nadać stvaranamu Nacyjanalnamu ahienctvu pa inviestycyjach i pryvatyzacyi. «My miarkujem, što heta budzie sposabam damahčysia maksimalna efiektyŭnaj pryvatyzacyi pradpryjemstvaŭ z maksimalnaj addačaj dla krainy», — zaznačyŭ Džarvis.
Aprača taho, pavodle jaho słoŭ,
jość i bolš šyrokaja tema — reforma pradpryjemstvaŭ.«Na hetym etapie my znachodzimsia na vielmi rańniaj stadyi pieramoŭ pa hetym pytańni. U cełym my ličym, što ŭ adnosinach da pradpryjemstvaŭ dziejničaje vielmi vialiki pieralik płanavych pakazčykaŭ, jakija inšy raz supiarečać adzin adnamu. My b chacieli, kab u pradpryjemstvaŭ była bolšaja svaboda dziejańniaŭ i bolš stymułaŭ, kab pracavać rentabielna i prybytkova», — rastłumačyŭ kiraŭnik misii MVF.
Adkazvajučy na pytańnie, jaki ŭpłyŭ na vydzialeńnie kredytu moža akazać palityčnaje stanovišča ŭ krainie, kiraŭnik misii fondu zajaviŭ,
što «MVF nie vystaŭlaje palityčnych umoŭ dla svaich kredytaŭ».Pry hetym Džarvis zaznačyŭ, što na pasiadžeńni vykanaŭčaha savieta MVF u sakaviku hetaha hoda było zajaŭlena ab hatoŭnaści padtrymać Biełaruś pry ŭmovie praviadzieńnia surjoznaj prahramy ekanamičnych i strukturnych reform. «Z taho času pytańnie pa Respublicy Biełaruś na pasiadžeńni vykanaŭčaha savieta MVF nie ŭźnimałasia, tamu nijakaj novaj infarmacyi ŭ mianie niama», — zaznačyŭ Džarvis.
