Ad novaha hodu spyniaje samastojny vychad hazeta «Hołas Radzimy» -- dziaržaŭnaje biełaruskaje vydańnie, raźličanaje na čytača, jaki žyvie pa-za miežami Biełarusi.
Ad 1 studzienia «Hołas Radzimy» razam z hazetaj «The Minsk Times» i časopisam «Belarus» stvorać medyja‑chołdynh pry redakcyi hazety «Biełaruś siehodnia». Apošnimi hadami «Hołas Radzimy» było stratnym vydańniem, jakoje nie pracavała sabie na karyść. Nakład hazety imkliva padaŭ. Mienavita z hetaj pryčyny i było vyrašyna stvaryć chołdynh.
Nia tak daŭno «Hołas Radzimy» z pryčyny adsutnaści srodkaŭ skasavaŭ biaspłatnuju rassyłku hazety za miažu. Zamiest raniejšych 16 staronak «Hołas Radzimy» budzie vychodzić na 4, jak dadatak da «The Minsk Times».
Z hazety sychodzić bolšaść žurnalistaŭ. Taksama ŭ vydańni maje źmianicca hałoŭny redaktar, zamiest Natalli Sałuk, jakaja była redaktarkaj vosiem hadoŭ, prychodzić Kaciaryna Niemahaj.
❏
Hazeta «Hołas Radzimy» była zasnavanaja ŭ 1955 h., i da studzienia 1960 h. nazyvałasia «Za viartańnie na radzimu». Jana ŭvachodziła ŭ ahulnasaviecki «chołdynh», jaki kantralavaŭsia Maskvoj. Maskoŭski analah zvaŭsia «Hołos Rodiny».
Mienskaje vydańnie było raźličanaje na biełaruskich emihrantaŭ, što sympatyzavali savietam, dy ščodra mazała brudam nacyjanalna śviedamuju emihracyju. Pry hazecie była zasnavana «Biblijatečka «Hołasu Radzimy». Pieralik nazvaŭ knih, vypuščanych u joj, havoryć sam za siabie: «Žyvija pryvidy», «Vosiem hod u nacyjanalistyčnym bałocie». Paśla hartavańnia padšyvak za 1955—1990 hh. i pračytańnia takich knižak uźnikała vostraje žadańnie staranna pamyć ruki. Z 1991 h. hazeta vypraviłasia. Ale apošnija hady bolš uvahi nadavała suajčyńnikam, što žyvuć u krainach byłoha SSSR, starajučysia nie pisać pra demakratyčna nastrojenych emihrantaŭ.
