Pra heta zajaviŭ siońnia Alaksandr Łukašenka napres-kanfierencyi 17 červienia.
«U nas takich hrošaj niama, — kanstatavaŭ jon. — My možam nahrebci z zołatam, z usim, što ŭ nas jość, 3,5–5 miljardaŭ dołaraŭ. Ja moh ryzykavać hetymi hrošami? Nie moh. <…> Ja viedaju, čaho mnie kaštavała źlitki skuplać pa ŭsim śviecie, dzieści štości vypłaŭlać. Siońnia ŭ nas 32 tony. Vy chočacie, kab ja hetyja 32 tony, jakija prynaležać užo našym dzieciam, vykinuŭ na rynak? Ja hetaha nie zrablu. Navat kali vy zaŭtra skažacie: usio — abo vykidvaješ, abo sychodziš, ja sydu. Ale ja hetaha nie zrablu. Heta toj stratehičny zapas, nu, prabačcie mianie, na vypadak vajny».
U svaim vystupleńni jon spačatku abvinavaciŭ nasielnictva ŭ tym, što jano svaimi dziejańniami spravakavała kryzisnuju situacyju, pačaŭšy skuplać valutu, zabirać układy z bankaŭ, kab abmianiać na valutu. A kali valuty nie chapiła, pabiehła skuplać cukar, sol. Tym samym jano spravakavała rost cen, pakolki «popyt padściobnuŭ canu».
Zatym prapanavaŭ vinavacić va ŭsim jaho, a nie ŭrad i Nacbank, kiraŭnictva jakich, pavodle słoŭ Alaksandra Łukašenki, jon nie źbirajecca adpraŭlać u adstaŭku.
U kančatkovym vyniku zajaviŭ: «Situacyja składanaja nie tamu, što chtości vinavaty». Pavodle jaho słoŭ, z 2007 hoda košt hazu vyras u 4,1 razu, nafta za apošnija paŭtara hoda padaražeła z 60–70 da 115–120 dołaraŭ za barel, mietał, kamplektujučyja — u 2–3 razy. «Jakaja ekanomika heta vytrymaje?» — zadaŭsia pytańniem Łukašenka.
Nasielnictva jon zaklikaŭ supakoicca i paabiacaŭ: «My spakojna na praciahu niekalkich miesiacaŭ pry adsutnaści ažyjatažu i hvałtu vyrulim na tuju vyšyniu, na jakoj pavinny znachodzicca dla taho, kab, supakoiŭšysia, budavać svajo žyćcio».
«Samaje hałoŭnaje dla ludziej: pierastańcie biehać, žyvicie spakojna. Ja viedaju, što siońnia niaprosta. Ale ludzi ž kupili cukar, sol — ciapier pradavajcie, vyručajcie hrošy i žyvicie na ich. Heta, kali žorstka pytańnie pastavić», — zajaviŭ Łukašenka.
Nasielnictva jon taksama papiaredziŭ: «Dołar siońnia drukujecca dzień i noč. Vy jašče trapicie ŭ hetuju pastku z dołaram i jeŭra, zychodziačy z taho, što ŭ jeŭrazonie i ŭ śviecie adbyvajecca ŭ ekanomicy. Tamu ja vam nie raju kidacca na dołary i jeŭra».
